Hevseroka Kongreya Neteweyî ya Kurdistanê (KNK) Zeyneb Mûrad têkildarî hevdîtinên li başûrê Kurdistanê daxuyaniyek weşand.
Mûrad anî ziman ku di hevdîtinan de yên bi partiyan û rêxistinên civakî yên sivîl re, wan tespît kirine ku ji bo yekitiya neteweyî zemînek heye û wiha got: “Em di wê baweriyê de ne ku bi berxwedana neteweyî, bi piştgiriya dost û parêzvanên azadiyê em ê êrîşan û hewldanên dagirkeriyê bişikînin.”
Mûrad têkildarî helwesta PDK’ê ya der barê hewldanên yekitiya neteweyî de jî ev tişt anî ziman: “Ji bo daxwaza me ya hevdîtina bi PDK’ê re hîn bersiv nehatiye dayîn. Me hîn jî nekarîn bi nûnerên wan re hevdîtinê ibkin. Ne bersiveke erênî ne jî neyînî nayê dayîn. Divê ew bi xwe aşkera bikin bê çima bersivê nadin. Deriyê me li her partî û rêxistinê vekiriye.”
Pêwîstî bi yekitiyê heye
Mûrad diyar kir ku du mehan wan li başûrê Kurdistanê kar kir û wiha dewam kir: “Bi her awayî divê mirov li ber dagirkeran rabin. Pêwîstiya gelê kurd ji her demê bêhtir niha bi yekitiya neteweyî heye. Pirsgirêk dûrî ji şerê navxweyî divê li dora maseya danûstandinê bi rêya diyalogê bên qedandin û çareserkirin. Ji ber ku yekitî û hevgirtin pêk nehatiye, eniyên parastina Kurdistanê lawaz dibin. Bi navê KNK’ê di asta Herêma Kurdistanê û Iraqê de me hewl da ku partiyên siyasî yên kurd, fraksiyonên parlamenteran, rêxistin, rewşenbîr, medya û rêxistinên jinan ên kurd bibînin.”
Bang li partiyên siyasî kir
Her wiha herî dawî Mûrad ev bang li partiyên siyasî kir: “Partiyên Kurdistanê hemû, li dijî êrîş û dagirkeriyê divê xwedî helwest bin. Di serî de jin û ciwan em bang li her kesên azadîxwaz dikin, ji bo pêşî li şerekî navxweyî bê girtin û dagirkeriya dewleta tirk bê astengkirin, zextê li aliyên siyasî bikin.”
