Navenda Nûçeyan |
Konseya Rêvebir a Kongreya Neteweyî ya Kurdistanê (KNK) ji ber ku li qada Metîna ya Herêmên Parastinê yên Medyayê di navbera hêzên kurd de alozî û şer pêk neye bi daxuyaniyek banga hestiyarî û diyalogê kir.
Di daxuyaniya KNK’ê de ev tişt hate diyarkirin:
“Serê vê sibehê li başûrê Kurdistanê li devera çiyayê Metîna, bûyerek pir xeter pêk hat û nûçeyên xembar gihîştin me. Di encama vê bûyera xemgîn de komek pêşmergeyan jiyana xwe ji dest da û komek jî birîndar bûn. Gelê Kurdistanê û dostên gelê me, ji ber vê bûyerê dilşkestî û xemgîn in. Em KNK jî, ji vê bûyerê xemgîn û dilgiran in.
Li çiyayê Metîna ji 40 rojan zêtedtir e, di navbera artêşa tirk û gerîlayên HPG’ê de şerek dijwar rûdide. Armancên dewleta tirk û encamên vî şerî diyar in. Artêşa tirk di êrîşên xwe de, gelê herêmê, gundên herêmê û xwezaya herêmê jî dagir dike. Heya niha 22 gunden kurdan û keldaniyan hatine valakirin, zevî û baxçeyên gundiyan û daristanên herêmê hatine şewitandin. Zêdetirîn hezar û 500 welatî ji wan gundan koçber bûne.
Serokomarê tirk roja 2’ê hezîranê li ber çavên cîhanê, di televîzyona xwe fermî de, peyama qetlîama li dijî kurdan dubare kir û got ku wê dewleta tirk kampa penaberan a Maxmûrê paqij bike. Li kampa Mexmûrê 13 hezar zarok, jin, mêr, kal-pîrên kurd hene û ji ber zilma dewleta tirk penaber bûne. Di rewşeke wiha de pewîstiya kurdan sekneke hevbeş a neteweyî ya dijê siyaseta komkujîya dewleta tirk heye.
Bi çi armancê be bila bibe, bê diyalog û bê agahdarî, şandina hêzek pêşmerge ji bo vê deverê, cihê pirsê ye. Armanc û rewşa bûyerê her çi dibe bila bibe, kî xetabar e kî heq e kî neheq e, li ser bersivên van pirsan wê bê rawestan. Lê tişta lezgîn ev e ku bûyer mezintir nebe û nebe sedema şerekî navxweyî. Gel û dostên me li ser vê rewşê hestiyar in. Divê em hemû hewl bidin ku bûyer mezintir nebe. Mezinbûna bûyerê dilê gelê me dişewitîne û dilê dijminan xweş dike.
Pirsgirêkên di navbera hêzên kurdistanî de, divê bi rêyên diyalogê bêne çareserkirin. Ji bo vê, ev nêzika salekê ye em di nava hewlên aştî û diyalogê de ne. KNK û Yekitiya Parlamenterên Kurdistanê li gel hinek kesayetên kurdistanî, komîteyek diyalogê ava kir û kete nava hewldanan. Ev hewldan heta niha jî berdewam in.
Em KNK, bang li aliyan dikin û dibêjin; di navbera xwe de diyalogê pêk bînin û pirsgirêkan bi guftûgoyê çareser bikin. Her wiha em bang li hemû hêz û kesên kurdistanî dikin ku di vî warî de xwedî helwest û rolekî pozîtîf bin.
Bi vê munasebetê, em ji pêşmegeyên jiyana xwe ji destdayî re rehmetê, ji gelê Kurdistanê û malbatên wan re sersaxîyê û ji birîndaran re şifayê dixwazin.”
