KNK’ê qirkirina li Helebçeyê bi bîra raya giştî ya cîhanê xist û ji hêzên navneteweyî yên erkdar xwest ku komkujiya Helebçeyê weke qirkirinê qebûl bike û sucdaran darizînin.
Konseya Rêveber a Kongreya Neteweyî ya Kurdistanê (KNK) ji ber salvegera 34’an a komkujiya Helebçeyê daxuyaniyek da.
Di daxuyaniyê de hate bibîrxistin ku 16’ê Adara 1988’an rejîma dîktator û faşîst a Saddam 5 hezar kurd bi çekên kîmyewî bi rengekî hovane qetil kir.
Daxuyaniya KNK’ê wiha dewam kir “Meha adarê ji bo Kurdistanê meheke bi naveroka xwe û bûyerên di vê mehê de qewimîn gelekî bi trajedî, têkoşîn û serhildanê tijî ye. Yek ji van rojên herî bi trajedî, komkujî û qirkirinê 16’ê Adara 1988’an li başûrê Kurdistanê li bajarê Helebçeyê bû. Li bajarê Helebçeyê zêdeyî 5 hezar kes ji aliyê rejîma dîktator û faşîst a Saddam ve bi çekên kîmyewî hatin qetilkirin ku di nava wan de zarok, jin û kesên bi temen hebûn. Ev qetlîama hovane hîn di mejî û ruhê gelê kurd de zindî ye û nehatiye jibîrkirin û wê tu carî neyê jibîrkirin. Her wiha di vê mehê de gelek qetlîam û qirkirin weke ya Helepçe ji aliyê dewletên koloniyalîst, faşîst û diktator li her çar beşên Kurdistanê pêk hatine.
Qatlîamên bi vî rengî ne ji aliye rejîma faşîst a Saddam bi tenê pêk tên. Her wiha dewleta tirk jî, di dîroka xwe ya sed salî de gelek caran bi çekên kîmyawî qetlîam û qirkirinê bi vî rengî pêk aniye û hîn jî dewleta tirk çekên kîmyawî li hemberî gelê kurd, li hemberî xelkên sivil bê cudahî bikar tîne. Dewleta tirk di nav van 2 salên dawî de bi dehan caran çekên kîmyawî li başûrê Kurdistanê li hember şervanên azadiyê û xelkên sivîl bikar aniye û hîn jî bikar tîne.
KNK careke din dixwaze ku qetlîam û qirkirina li dijî gelê kurd, ya li bajarê Helebçeyê bi bîra raya giştî ya cîhanê bixe û dixwaze Neteweyên Yekbûyî, Yekitiya Ewropa û Dîwana Edaletê ya Navdewletî komkujiya Helebçeyê weke Qirkirinê qebûl bike û sucdaran darizîne.
Gelê kurd tu carî komkujî û qirkirina Helebçeyê ji bîr nake û wê her tim di mejî û ruhê kurd de zindî bimîne. Ruhê şehîdên Helebçeyê şad be.”
