KNKyî qetilkerdişê Dîyar Xerîbî şermezar kerd û va: “No tena nêbeno sebebê heyf û nêrehetîya neteweyîye. Heman wextî de beno sebebê şermezarî û şikitişê ercê neteweyêkê bindestî.” KNKyî veng da îdarekaranê Başûrî ke vernîya ajanîye û xîyanetî bigêrê
Konseya Rayberdişî ya KNKyî qey şehadetê endamê Konseya Serekîya Pêroyîye ya KCKyî Dîyar Xerîbî eşkerayîyêka nûştekîye weşanaye. Eşkerayîye de ame pêhesnayene ke Dîyar Xerîb dimayê xebat û mucadeleyê 25 serran a fedakarîye û dûrê menfaatanê şexsîyan û keyeyî netîceyê bombardûmankerdişê îşxalkaran de tewrê karwana serfirazîye ya bêmergan bîyo.
KNKyî şarê Kurdistanî, embaz û keyeyê Dîyar Xerîbî rê û merdimanê di mucadelekerdoxanê ke ê dir şehîd bîyê rê serweşîye waste û vat rayîrê fedaîyan her tim serkewtiş o.
KNKyî bale ant ke bê ajanîye û xorotişîya xomîyanêne dewleta tirkî Anqara ra nêeşkena şopa mucadelekerdoxêkê Kurdî bivîno û vat bi paştdayîşê ajanîya xomîyanêne no qirkerdiş virazîyayo. KNKyî hukmat, parlemento û her tewir îdareyanê Başûrê Kurdistanî ra waşt ke mesuldarîyanê xo bîyarê ca û vernî ro ajanîya xomîyanêne bigêrê.
KNKyî dewamê eşkerayîya xo de nê va: “Eşkera yo ke îşxalkarê Kurdistanî zereyê krîzanê sîyasî, leşkerî û ekonomîkan ê pîlan de yê. Roje bi roje hîna zaf benê bêîrade û bêmoral. Na yewe ra hemeyê hêzê xo seba terorîzekerdişê şexsîyetanê Kurdan şuxulnenê. Ê û ma zî zanê ke nêmendişê Dîyar Xerîbî û embazanê ci çende dejêko pîl bo zî, ca û meqamê înan veng nêmaneno û netîce de serkewtiş ê Kurdistanî û şarê ci yo. La birîna ke bi destanê xomîyanênan virazêna derman nêbena.
Ma heme mucadelekerdox û xemwerdoxanê Kurdistanî ra wazenê ke dereceya xebata xo bikerê berze û hîna bicesaret hemverê îşxalkarîye de vinderê. Yewbînan rê wayîr vejîyê û şarî hemverê îxanetê xomîyanênî de haya bikerê. Ma îdareyê Başûrê Kurdistanî ra wazenê ke vernîya ajanîye û îxanetê xomîyanênî bigêrê û no gureyo pîroz o ke milê înan ser o yo bica bîyarê.” BRUKSEL
