Koçberên Serêkaniyê diyar kir ku komên çete şêniyên ku li mala xwe vedigerin dikujin. Şêniyan ji HSD’ê xwest ku bajarê wan ji dagirkeran rizgar bikin û dixwazin vegerin warên xwe
Ji ber êrîşên qirkirinê yên dewleta tirk ên li dijî rojavayê Kurdistanê, zêdetirî 300 hezar welatiyên ji Serêkaniyê, Girê Spî û bajarok û gundewarên wan koçber bûn. Hêzên dagirker ên dewleta tirk û çeteyên wê yên DAIŞ, El Nusra û OSO’yê mîna li Efrînê, welatiyên ku li malên xwe vedigerin dikujin û demografyaya herêmê diguherînin.
Welatiyên ku niha li bajarên din ên Rojava dimînin dixwazin ku vegerin malên xwe. Têkildarî mijarê jî ji ANHA’yê re axivîn. Ji welatiyan Fatme Elî ku ji Serêkaniyê ye anî ziman ku ew ji ber bombebarana artêşa tirk koçber bûn. Elî diyar kir ku çeteyên dewleta tirk malên wan talan kirin û wiha dom kir: “5 malên me hebûn lê tiştek jê nemaye. Lê dîsa jî em dixwazin vegerin ser mal û milkên xwe. Ger em vegerin em ê hebûna çeteyan qebûl nekin.”
Dixwazin HSD bajarên wan biparêzin
Ji koçberên Serêkaniyê Mihemed Elî Rimo jî destnîşan kir ku ji ber çeteyan nikarin vegerin malên xwe û da zanîn ku çete her kesekê ku vedigere mala xwe dikujin. Rimo got ku ew dixwazin vegerin bajarên xwe û bila HSD bajarên wan biparêze.
Bang li HSD’ê kir
Welatiya bi navê Etiya Bozo ya ji Serêkaniyê jî daxuyand ku dema ji bajar derdiketin, li ser rêya Esediyê balafirên artêşa tirk maşîneya wan hedef girt û wiha bi dawî kir: “Çeteyan tiştek nehiştin. Em dixwazin HSD dawî li dagirkeriya dewleta tirk û çeteyên wê bîne. Ji bilî HSD’ê em tu hêzan qebûl nakin.” HESEKÊ
