Tirkîya de hûmara kesê ke heta nika testê înan yê Vîrusê Korona (Covid-19) pozîtîf vejîya 122 hezar û 392 û hûmara kesê ke cuya xo vindî kerdî zî 3 hezar û 258 ya. Vîrus vilayê pêroyê bajaranê Tirkîya bî û heme bajaran de vaka ame tespîtkerdene. Nê bajaran ra yew zî Mêrdîn o. Bajar de heta nika seba tedbîran 10 taxî girîyayî karantîna. Koçerê ke Bagokî de cuyenî nika ra xo hadre kenî ke vera heme astengîyan de şêrî zozanan. Rewşa koçeranê ke dewa Marîne ya kontarê koyê Bagokî de cuyenî zî eynî ya û ê zî bi ameyîşê wisarî reyde hadreyîya şîyayîşê zozanan kenî.
‘Ma do raywanîya xo de tehlukeya vîrusî bifikirî ‘
Koçeran ra Aysel Çetîne dîyar kerde ke ê emserr raywanîya xo de tehlukeya vîrusî bifikirî û wina va: “Ma her serre yenî tîya û menganê zimistanî tîya de vîyarnenî. Ma ameyîşê wisarî reyde hadreyîya xo kenî û heywananê xo gênî û şonî zozanan. Tîya de bi hezaran koçerî şonî zozananê Şirnexî. Ma emserre vîrus vera tay erê mendî. La qedexe zî bibo, vîrus zî bibo ma mecburê şêrî.”
‘Ma mecburê seba heywananê xo şêrî’
Çetîne qiseykerdişê xo yê peyênan de ard ziwan ke ê heme lazimîyanê xo têvist û va: “Ma ewilî heywana erşawenî. Dima ra zî ma vejîyenî rayîr. Vîrus vera şik û tersê ma esto. Beno de destûr zî nêdîyo. La heywanê ma estî. Ma nêeşkenî hamnan tîya de bimanî. Ma seba xo nê, seba heywananê xo şonî. Hewa tay zî germ bibo, ma do bikewî rayîr.” MÊRDÎN
