Navenda Nûçeyan
PJAKʼê salvegera 75ʼan a damezirandina Komara Kurdistanê de ji bo yekitiya neteweyî bang li aliyên siyasî û kesayetan kir û ragihand ku Komara Kurdistanê hîmê bingehîn ê çanda demokrasiyê bû.
Partiya Jiyana Azad a Kurdistanê (PJAK) bi rasthatina salvegera 75ʼan a damezirandina Komara Kurdistanê daxuyaniyek nivîskî li ser malpera xwe weşand.
Di destpêka daxuyaniyê de peyama pîrozbahiyê tê dayin û wiha tê gotin; “Xebata azadîxwazî û demokrasiyê ya neteweya kurd xwedî zemîneke xurt e. Dîroka neteweya me ji rûpelên zêrîn û waneyan tijî ye ku di sedsala 20’an de bûne bingehê çêbûna kesayeta kurdê azad. Kesayetek welê ku tevî hemû hewldanên dagirkerên herêmî û cîhanî, tunekirina hebûna gelê me, tunekirina fizîkî û çandî, ne tenê qada têkoşînê bernadeya, belku li hemû serdeman geştir erka pêşengiya gelên herêmê ya ji bo jiyana bi hev re ya azad û wekhev li ser milê xwe girtiye. Li hemû Kurdistanê hunera berxwedanê pêşkeftiye.”
Hîmê çanda demokrasiyê ye
PJAK’ê diyar kir ku Komara Kurdistanê hîmê bingehîn ê çanda demokrasiyê bû û ji dubendiyê dûr bû û wiha tê gotin; “Em dikarin bêjin, ji Komara Kurdistanê heta Xwerêveberiya Rojava çandek hate afirandin û bingehê rastiya me hat danîn. Girîngîdana vê çandê û ji ezmûn û destkeftiyên demokrasiya Komara Kurdistanê wane derxistin xwedîderketina li vê rastiyê ye. Erka hemû kes û aliyane. Dibe ku li gorî dijmin temenê Komara Kurdistanê kurt be, lê tişta ku hat rûxandin, pêkhateyek bû, ne çandek bû. Di sîstema xwerêveberiyê û di pêkhateyek nû de ev yek hat ispatkirin ku temenê Komara Kurdistanê dirêj e. Em ê bi hemû hêza xwe ji bo vejandina vê çandê têbikoşin. Herwiha di vê rojê de bang li hemû alî û partiyên siyasî û kesayetên civakî dikin ku ji bo yekîtiya neteweyî û lidarxistina kongreya neteweyî li ser bingehê nirxê neteweya me têkoşîn bikin û ji bo yekrêzî û aramiyê xebata hevbeş bi rêve bibin.”
