Teslîmbûna çeteyên DAIŞ’ê ya li Baxozê didome. Komeke çeteyên DAIŞ’ê ku êdî nekarî li ber xwe bidin, di danê sibehê de teslîmî HSD’ê bû. Her wiha çeteyên DAIŞ’ê êrîşî çete û malbatên wan ên ku teslîm dibûn kir
Şervanên Hêzên Sûriyeya Demokratîk (HSD) operasyona xwe ya ji bo rizgarkirina gundê Baxoz ê Hecîn a Dêrazorê ku cihê dawî yê di bin kontrola çeteyên DAIŞ’ê de ye, didomînin. Şervanên HSD’ê ji bo ku zirar negihije sivîlên di destê çeteyên DAIŞ’ê de, bi baldarî tevdigerin. Di nava çend rojên dawî de jî bi hezaran çete û malbatên wan teslîmî şervanan bûn.
Li gorî agahiyên ji Baxozê, çeteyên DAIŞ’ê yên li gundê Baxozê hatine dorpêçkirin kom bi kom xwe radestî şervanan dikin. Çavkaniyên ji herêmê da zanîn ku di danê sibehê de komeke çeteyên DAIŞ’ê xwe radestî şervanan kir. Teslîmbûna çeteyan a li Baxozê didome.
Çeteyên DAIŞ’ê yên ku naxwazin teslîm bibin jî hewl didin ku bi êrîşên xwekujiyê û çekên giran xwe biparêzin. Lê hemû hewldanên çeteyan ji hêla şervanên HSD’ê ve vala tên derxistin. HSD’ê jî duh bi daxuyaniyekê ragihand ku çeteyên DAIŞ’ê di korîdora ewlehiyê de li dijî çete û malbatên wan ên teslîm dibûn, 3 êrîşên xwekujiyê pêk anîne. HSD’ê ragihand ku di encamê de 6 çeteyên ku xwe radest dikir mirin, hejmareke çeteyan birîndar bû û 3 şervanên wan jî bi sivikî birîndar bûne. DÊRAZOR
