Rêveberên Komeleya Jinan a Rosa Parêzer Gozde Engîn, bi daxuyaniyekê rapora hemû xebatên xwe aşkere kir û diyar kir ku ji roja hatine vekirin heta îro li pey hemû xebatên xwe ne. Engîn, diyar kir ku bi girtin û binçavkirina endam û rêveberên wan dixwazin xebatên Komeleya Jinan a Rosa yên ji bo parastina mafê jinan îlegalîze bikin.
Rêveberên Komeleya Jinan a Rosayê ji bo şermezarkirina êrîşên li dijî komeleyê û parvekirina xebatên xwe li ber avahiya komeleyê daxuyaniyek da. Di daxuyaniyê de endam û rêveberên komeleyê, aktîvîstên TJA’yê, endamên OHD’ê û rêveber û parlamenterên HDP’ê amade bûn. Rêvebera komeleyê Prz. Gozde Engîn daxuyanî xwend.
Engîn diyar kir ku komeleya wan hemû xebatên xwe li gorî prosedura qanûnî dimeşîne û wiha domand: “Komeleya me ji bo têkoşîna li dijî hemû cureyên tundiya li dijî jinê hatiye avakirin û xebatên xwe dike. Hewl didin van xebatên me neqanûnî nîşan bidin. Em li pişt xebatên xwe yên me heta niha kirine û dozgeriyê jî vedixwînin berpirsyariyê ku hemû delîlan kom bike û li gorî zagonê tev bigere. Me mafê xwe yê zagonî parastiye û ji bo vê jî ji tu kesî lêborînê naxwazin. Heke li şûna ku hevalên me bigirin, kesên tacîzkar û tecawizkar bihatina girtin wê hemû rojên me bi cînayetên jinan dest pê nedikirin. Wê demê jixwe hewcehî bi çalakiyên me jî nediman. Me heta niha çi kiribe, dê ji vir û pê de jî heman xebatan bikin.”
Rapora xebatê ya komeleyê wiha ye:
11 çile sala 2019: Kampanyaya ‘Em bibin heviya Oyku Arîn’ hate destpêkirin.
3 adar sala 2019: Panela Jin û Şer a li gorî biryara 1325’an a NY’yê hat lidarxistin.
7 adar 2019: Tora Têkoşîna Li Dijî Tundiya Jinê ya Amedê hate avakirin.
8 adar 2019: Di Konsera Rewşen Çelîker de em bi jinan re hatin cem hev.
21 gulan 2019: Ji bo prz. Muzeyyen Boylu ku li Amedê hate qetilkirin daxuyanî hate dayîn.
27 gulan 2019: Ji bo Merve Unal a li Amedê hatiye qetilkirin daxuyanî hate dayîn.
21 hezîran 2019: Li dijî qetilkirina jinan meşa jinan hat lidarxistin.
8 hezîran 2019: Çalakiya Xemrî û Reş hat lidarxistin.
8 hezîran 2019: Çeteleya Adar Hezîranê ya Bajar hate aşkerakirin.
24 tebax 2019: Çalakiya ‘Em naxwazin bên kuştin’ hate lidarxistin.
28 tebax 2019: Li dijî qetilkirina jinan meşa jinan hate lidarxistin.
2 tebax 2019: Çalakiya Konvoya Xemrî hate lidarxistin.
30 tebax 2019: Serdana li dijî tayînkirina qeyûman hate kirin.
22 îlon 2019: Tev li komxebata ‘Platforma Têkoşîna Ji Bo Jinên Bi Zorê Hatine Desteserkirin’ bûn.
7.10.2019: Tev li perwerdehiya Tora Qasidan a Behra Spî bûn.
11 cotmeh 2019: Bi sernavê ‘Jin aştiyê dixwazin’ daxuyanî hate dayîn.
7 mijdar 2019: Tev li şîna Muteber bûn.
19 mijdar 2019: Têkildarî ‘25’ê Mijdarê Roja Têkoşîna Li Dijî Tundiya Li Ser Jinê’ xebata agahdarkirin û hişyarkirinê hate kirin.
20 mijdar 2019: Têkildarî 25’ê Mijdarê bi endaman re civîn hate lidarxistin.
25 mijdar 2019: Bi jinan re hatin cem hev.
23 mijdar 2019: Têkildarî 25’ê Mijdarê komxebata jinan a li dijî tundiyê hat lidarxistin.
23 mijdar 2019: Têkildarî 25’ê Mijdarê meşa şevê hate lidarxistin.
10 kanûn 2019: Çeteleya tundiyê ya meha tîrmeh-kanûnê ya bajar hate aşkerakirin.
24 kanûn 2019: Atolyeya Xeyal û Aştiyê hate avakirin.
26 kanûn 2019: Roja îmzeyan; Emîne Esmer ‘Hêlîna Evînê’
06 çile 2020: Li dijî zagona îstismarê daxuyaniya çapemeniyê hate dayîn.
20 çile 2020: Rapora Gulistan Doku bi raya giştî re hate parvekirin.
22 çile 2020: Ji bo Melîke mala şînê hate vekirin.
22 çile 2020: Çalakiya Zincîra Jiyanê hate lidarxistin.
27 sibat 2020: Çalakiya Gulistan Doku li ku ye? Hate lidarxistin.
8 adar 2020: Mîtînga 8’ê Adarê hate lidarxistin.
16 gulan 2020: Çalakiya Zincîra Mirovan a Xemrî hate lidarxistin.”
Piştî aşkerakirina raporê jî jinan bi dirûşma ‘Jin jiyan azadî’ dawî li çalakiya xwe anî. AMED
