Dewleta tirk ji bo dagirkirina bakur û rojhilatê Sûriyeyê, komên çete yên OSO’yê ku ji 100 wesayîtan pêk dihat anîn Kaniya Xezalan a li hemberî Girê Spî
Dewleta tirk, komên çete yên OSO’yê ku dê ji bo dagirkirina bakur û rojhilatê Sûriyeyê bi kar bîne, şevê din derdora saet 02:30’an de derbasî navçeya Kaniya Xezalan a Rihayê ku li pêşberî Girê Spî ye kirin.
Hat zanîn ku komên çete ji herêma Ezazê ya Sûriyeyê derbasî Kîlîsê hatine kirin û ji wir jî bi otobusan anîn navenda navçeya Kaniya Xezalan. Li gorî agahiyan, konvoya ku ji 100 wesayîtên leşkerî pêk dihat, derbasî Navenda Stargeha Demkî ya Kaniya Xezalan bû û çete li herêmê hatin bicihkirin.
Konvoya leşkerî li gel tîmên trafîkê yên cendirmeyan û wesayîtên leşkerî yên artêşa tirk hatin navçeyê. Tevî otobusên ku çete tê de bûn, her wiha TIR ên ku doçka û wesayîtên ji bo şer bên bikaranîn di nava konvoyê de hebûn. RIHA
