Komîteyê PKK-PAJKî yê zîndanan: Halê weşîye yê hemrayanê ma Leyla Guvene û Nasir Yagizî çend şino bena xirabe. Eke tavilî nêkewê mîyanê têgêrayîşî do netîceyê ke nênê waştene vejîyê werte. Na yewe ra vateyî hendî manaya xo vîndî kerda.
Komîteyê PKK-PAJKî yê zîndanan derheqê grevanê vêşanîyan ê zîndanan de eşkerayîyêka nûştekîye daye. Komîteyan vat: “Vîst serrî yo Rayber Apo Îmrali de hemverê sîstemê îşkenceyî de xoverdayîşêko biîhtîşam û tarîxî dano. No xoverdayîşo ke serkêşîya Rayber Apoyî de hemverê hêzanê komplokaran û dewleta Tirkan a faşîste de dîyeno heme kayê hêzanê ke hemverê şaran û demokrasî de yê veng vetî.
Na yewe ra hêzê komplokarî yê mîyanneteweyî û îqtîdaro faşîst ê AKP-MHPyî seba ke mucadeleyê azadîya Kurdan biqedînê û şarê Kurdî qirkerdişê sîyasî û kulturîya ra ravêrnê serê Rayber Apoyî de tecrîdêkê giranî bica anê. Nê hetî ra tecrîdo ke hemverê Rayber Apoyî de yeno bicaardene eslê xo de serê şarê Kurdî, şaranê Anadolu û Rojakewtena mîyanêne de yeno bicaardene.
Komîteyanê zîndanan eşkerayîya xo de ca da nînan: “Têgêrayîşê Azadîye, şaro Kurd û dostê înan hemverê sîstemê îşkenceyî yê Îmraliyî de û hemverê nê tecrîdî de mucadeleyêkê xurtî danê. Ewro hemleya ‘Ma tecrîdî bişiknê, faşîzmî birijnê’ ya ke bi serkêşîya tepişteyanê zîndanan amî destpêkerdene bîya tîtikê mucadeleyê hemverê sîstemê îşkenceyî yê Îmraliyî û amacê ci rijnayîşê faşîzmî yo.
Çîyo ke keweno serê milê ma bingeyê wedartişê tecrîdî de ardişê peynîya faşîzmî yo
Na yewe ra sere de yê Leyla Guvene ganî waştişê tepişteyan rast bêrê famkerdene. No waştiş waştişêko basît û rêze ra nêyo. Waştişê mucadeleyê hemverê faşîzmî waştişêko tarîxî yo. Pêvînayîşê birayê Rayber Apoyî yan zî pêvînayîşê CPTyî yê Rayber Apoyî nêno manaya wedarîyayîşê tecrîdî. Ganî peynî bi bicaardişanê antî-demokratîkan ê Îmraliyî bêro ardene, têkilîyê Rayberîya ma dinyaya teberî dir bêvindertiş bêro ronayene, Rayberîya ma hetê doktoranê xoseran ra bêro muayenekerdene. Hemleya xoverdayîsî do nê bingeyî de bi wedarîyayîşê tecrîdî bireso amacê xo.
Nizdbîyayîşo peyên ê îqtîdarê AKP-MHPyî yo faşîst bi temamî seba vengvetişê xoverdayîsî yo û wazeno ke vernîya hemleya ma bigîro. Bêguman pêvînayîşê birayê Rayberîya ma bi Rayberîya ma dir çîyêko rind o û netîceyê xoverdayîsî de virazîyayo. La no nêno na mana ke tecrîd wedarîyayo. Tersê faşîzmî yo tewr gird xoverdayîşo komelkî yo. Çîyo ke keweno ma milan ser heme şertan de û kamcîn wareyî de beno wa bibo bi qerardarîyêka pile xurtkerdişê xoverdayîsî yo û bingeyê wedartişê tecrîdî de ardişê peynîya faşîzmî yo.
Vateyî hendî manaya xo vindî kerdî
Çalakîya hemraye Leyla Guvene roja xo ya 68ine de ya û ya hemra Nasir Yagizî roja xo ya 55ine de ya. Halê weşîye yê her di hemrayanê ma zî çend şino bena xirabe. Ganî qaso ke bi îqtîdarê AKP-MHPyî yê faşîstî game pey de bêro eştene xoverdayîş bêro xurtkerdene, eke wina nêbo do netîceyê ke nênê waştene vejîyê werte. Na yewe ra vateyî hendî manaya xo vîndî kerda. Roje roja şikitişê bendanê tersî ya, roja her cayî açarnayîşê wareyê çalakîye ya.
Nê bingeyî de ma veng danê heme şarê Kurdî û şaranê Kurdistanîyan, dostanê xo, rayapêroyîye ya demokratîke û heme sazîyanê demokratîkan ke sere de dorê Leyla Guvene de dorê heme çalakwananê grevê vêşanîye de bêrê têhet û mucadeleyî pîl bikerê.” AMED
