Komxebata navneteweyî ya têkildarî DAIŞ’ê di roja dawî de li Amûdê berdewam dike. Îro jî mijarên weke milên mafnasî yên terora DAIŞ’ê û çareserî û pêşniyarên ji bo çareserkirina terora DAIŞ’ê bên nirxandin. Komxebat îro dê bi encamnameyekê bi dawî bibe
Yekemîn Komxebata Navneteweyî li Cîhanê ya têkildarî DAIŞ’ê ku bi pêşengiya Navenda Lêkolînên Stratejîk a Rojava (NRLS) ve hate organîzekirin, li navçeya Amûdê ya bajarê Qamişlo li Hola Beylesan di roja sêyemîn de dest pê kir. Îro roja dawî ya komxebatê ye û dê li ser du mijaran semîner bên dayîn.
Di mijara yekemîn de dê milên mafnasî yên terora DAIŞ’ê bên nirxandin. Komkujî, kiryar û binpêkirinên terora DAIŞ’ê ya der heqê jinan de, binpekirinên DAIŞ’ê li gorî qanûn û peymanên navneteweyî, darizandina endam û malbatên DAIŞ’ê û her wiha zelalkirina dem û darizandina wan dê di nava vê mijarê de bên nîqaşkirin. Lêkolîner û Mafnasekî pispor di çareserkirina şer de Gadi Sari dê moderatoriya mijarê bike û pisporê qanûnên navneteweyî Mehmud Patil, endamê Komîteya Mafnasiyê ya bakur û rojhilatê Sûriyeyê Luqman Xidir Îbrahîm û mamosteyê mafnasiyê yê Zanîngeha Parîsê Dominique Inchauspe jî dê semînerê bidin.
Çareserî û pêşniyar
Di mijara duyemîn de jî dê çareserî û pêşniyarên ji bo çareserkirina terora DAIŞ bên nirxandin. Di nav vê mijarê de çareserkirina terora DAIŞ’ê ji hêla siyasî, leşkerî, ewlekarî, civakî, aborî, civakî, qanûnî, olî û çandî de bê analîzkirin. Moderatoriya mijarê dê mamosteyê Zanîngeha Bexdayê Farah Sabir bike. Semîner jî ji aliyê bijîşk û pisporê nakokiyên navneteweyî Thoreau Redcrow, damezirînerê Navenda Navneteweyî ya Lêkolînên Tenduristiyê Dr. Peter Neuman, endamê Navenda Navneteweyî ya Tundrawiyê lêkolîner Peter Knnob û lêkolîner û nivîskar Çeleng Omar ve bê dayîn.
Gotûbêj dê bi mêvanan re bên kirin û dê komxebat bi xwendina encamnameyê ji raya giştî û çapemeniyê re bi dawî bibe. QAMIŞLO
