Konferansê Akademîya Modernîteya Demokratîke bi şîarê ‘Hunerê Azadîye-Rêxistinîye û Stratejîyanê Xoverdayîşê Kolektîfî’ mabênê 17-19ê teşrîna peyêne de şaristanê Baselî yê Swîsre de ame kerdene û qedîya. Ewropa, Afrîka, Amerîkaya Latîne û Asya ra xeylêk temsîlkarê rêxistinan tewrê konferansî bîyî.
Vizêr roja peyêne de bi sernameyê ”Fikrê sosyalîzmî”, ”Dewrê Şorişê Cinîyan”, ”Sosyalîzm de israr, merdimatîye de israr o”, ”rêxistinîye û enternasyonalîzm”, ”Deskewte, zehmetî û perspektîfê têgêrayîşê azadîye yê Kurdîstanî” panelî ameyî kerdene.
Panelan de meseleyê şaranê xoverdayoxan û çareserîyê înan ameyî nîqaşkerdene. Nîqaşan de bale ameye antene tesîranê sîstemê kapîtalîstî û pederşahîye ser û ame parekerdene ke ganî cinî û ciwanî awankerdişê dinyaya newîye de û pîlkerdişê têkoşînê enternasyonelî de hîna zaf rolan bigêrê.
Panelan ra ber mesajê ke bi vîdeoyan Rojawanî ra ameybî ameyî mojnayene. Mesajan de ame vatene ke Şorişê Rojawanî şorişê şaran o û seba ke şoriş bêro pawitene ganî paştdayîşêko enternasyonal bêro kerdene.
3 rojanê konferansî de dîya zanayene ke seba çareserîya meseleyan paradîgmaya Konfederalîzmê Demokratîkî, modernîteya demokratîke û neteweya demokratîke ya Rayberê Şarê Kurdî Abdullah Ocalanî ganî bêra caardene.
Fînalê Konferansê Modernîteya Demokratîke de veng dîya ke wa paştdayîşo enternasyonal bêro pîlkerdene û warê xoverdayîşî yê hemparî bêrê zêdînayene. BASEL
