Şaristanê Baselî yê Swîsre de vizêr Konferansê Akademîya Modernîteya Demokratîke roja diyîne de dewam kerd.
Beşê nêmroje yê konferansî de Komîteya Cinîyan a Esîle kargehî û roniştişêk serûber kerdî. Roniştiş de têkoşînê têgêrayîşê cinîyan ê kurdan û tecrubeyê ci ameyî nîqaşkerdene. Roniştiş de meseleyanê partîyarka û sîstemê serdestîya camêrdan ser o çareserîyî ameyî pêşkêşkerdene.
Dima cinîyan panelê ”Vakurê Kurdîstanî de awankerdişê xoserîya demokratîke” da. Panel de Hemşaredara Wanî ya verêne Bedîa Ozgokçe û aktîvîst Tuncay Okî qisey kerd. Înan tecrubeyê xo yê serê şaredarîyanê Vakurî û polîtîkayê qeyûman ercnayî.
Cemê şanî rêxistinanê Asya, Afrîka, Ewropa, Amerîka, Amerîkaya Latîne û Asya sey beşdaranê konferansî bi eşkerayîya çapemenîye paştî daye Hemleya ‘Abdullah Ocalanî rê Azadîye, Meseleya Kurdan rê Çareserîya Sîyasîye.’
Eşkerayîye de dîya zanayene ke kurdî Rayberê Şarê Kurdî Abdullah Ocalanî sey temsîlkarê xo vînenê û meseleya kurdan de aktorê çareserîye yo girîng Abdullah Ocalan o. Eşkerayîye de tecrîdê vera Rayberê Şarê Kurdî ame şermezarkerdene û wina ame vatene:
”Paradîgmaya ekolojîke, neteweya demokratîke û azadîgîra cinîyan a Abdullah Ocalanî seba xoverdayîş û têkoşînê globalî girîng a. Na paradîgma seba ke modernîteya kapîtalîste bêra rijnayene perspektîfê çareserîye pêşkêş kena. Coka ma paştî dana na hemleya azadîye û vanê: Fikrî nênê hepskerdene! Abdullah Ocalanî rê Azadîye!”
