Kongreya 4. ya Meclîsê Sûrîyeya Demokratîke (MSD) vizêr dest pêkerd û bi netîcenameyêkî qedîyaye. Kongre Reqa de ameye kerdene û tewr tay 400 delegeyî tewrê ci bîyî.
Netîcename de birê kongre cagênê. Kongre de bire dîyaye ke dîyalogê mabênê şaranê Sûrîye bêrê xurtkerdene, terefanê krîzê Sûrîye de dîyalogî û têkilîye wa bêrê kerdene, wa verê îşxal û vurnayîşê demografî bêro girewtene û rewşa kampan bêra holkerdene.
Kongre de Leyla Qereh Man û Mehmud Deham Ebdulezîz bîyî hemserekê neweyî.
Leyla Qereh Man 1980 de Efrîn de dadîya xo ra bîya. A Şorişê Rojawanî ra dima mîyanê têgêrayîşê cinîyan de cagêna û sey temsîlkara Kongreya Starî ya Lubnanî erk gêna. Leyla Qereh wextêk hetkarîya Hemserekanê MSDyî zî kerde û 2020 de zî tewra Partîya Ameyoxê Sûrîye bîye.
Mehmud Deham Ebdulezîz 1974 de Hesekê de dadîya xo ra bîyo. Ey beşê Têkilîyanê Mîyanneteweyîyan de master kerd û xebatê serê Rojhelatê Mîyanênî kerdî. Mehmud Deham Ebdulezîz Zanîngehê Ohio û Oberlinî yê Amerîka de akademîsyen o. O 2014 de bi sûcdarîya ‘endamîya rêxistina qedexekerde’ hetê hukmatê Şamî ra tepişîyabi.
