Partîya Çepe ya Ewropa kongreya xo ya 7. Viyana de mabênê 9-11ê kanûne de kerde. Xeylêk welatan ra temsîlkarê 26 partîyan tewrê kongre bîyî. Hemvervatoxê Têkilîyanê Teberî yê HDPyî Feleknase Uca, temsîlkarê Federasyonê Kulturê Demokratîkî yê Kurdan û KNKyî zî tewrê kongre bîyî.
Vervatoxê Karanê Teberî yê FEYKOMî Mustafa Dîllîce û Lorîne Şahan kongre de qisey kerd û dîyar kerd ke tecrubeyê Konfederalîzmê Demokratîkî yê Rojawanî zaf girîng ê û seba pawitişê nê tecrubeyî paştdayîş lazim o. Wekîla HDPyî Feleknase Uca pare kerd ke ê Tirkîya de partîya raybera têkoşînê vera şerî yê û xoverdayîşê xo yê demokratîkî rê dewam kenê.
Nameyê KNKyî ser o Sînan Onalî zî ard ziwan ke meseleya kurdan eke Rayberê Şarê Kurdî Abdullah Ocalan azad bibo çareser bena. Babetê hêrişanê kîmyewîyan, qedexeyê vera PKKyî, şorişê ‘jin, jiyan, azadî’ yê Îranî û xeylêk meseleyê bînî ameyî ercnayene.
Nameyê Partîya Komunîste ya Newera Awanbîyayîşî ya Îtalya ser o Maurizio Acerboyî qisey kerd û dima alaya PKKyî akerde, waşt PKK lîsteya terorî ra bêro vetene û Abdullah Ocalan bêro azadkerdene. Acerboyî waşt ke ganî Partîyê Çepî seba nê çîyan bixebitê.
Vernîyazê biran de vernîyazêkê seba paştdayîşê bi kurdan ame qebulkerdene û tede ame vatene ke ê do vera rejîmê Erdoganî tim hetê HDPyî de bê. Reyna vernîyaz de ame vatene ke peymanê çekan ê bi Tirkîya bêrê betalkerdene, Selahattîn Demîrtaş zî tede wa pêro tepişteyê sîyasîyî wa vera bidîyê.
Walter Baiero ke bi sereko newe yê partîye îfade kerd ke paştdayîşê b Kurdîstanî înan rê karêko sereke yo. VIYANA
