Navenda Nûçeyan |
Di sala 2014’an de dema êrîşa hov a çeteyên DAIŞ’ê li dijî Kobanê dest pê kir, bi dehan şervanên YPG, YPJ’ê li hemberî êrîşan berxwedaneke dîrokî raber kirin. Bi dehan gelên welatên Asya, Ewropa û Amerîka Latîn bi hevbendiyeke enternasyonalîst piştgirî dan wê berxwedanê û Roja 1’ê Mijdarê wekî Roja Piştgiriya Kobanê ya Cîhanê ragihandin.
Têkildarî mijarê Kongreya Star daxuyaniyek da û ev tişt parve kir:
“Kongreya Star bi boneya 1’ê Mijdarê salvegera heftemîn a Roja Kobanê ya Cîhanê pêşwazî dike. 7 sal berê Kobanê ji aliyê çeteyên DAIŞ’ê ve hat dorpêçkirin û êrîş kirin. Rewş bêhêvî dixuya lê berxwedana bêhempa ya gelê Kobanê bi taybetî jinan bandorek mezin çêkir. Beşek din a berxwedanê li derveyî Kobanê pêk hat, gel û hêzên demokratîk ên li çar aliyê cîhanê ji bo piştgiriyê bidin berxwedanê rabûn ser pêyan. Berxwedana lehengî ya şervanên YPJ û YPG’ê û desteka ji çar aliyên cîhanê bû destpêka bidawîbûna DAIŞ’ê. Ev ne tenê serkeftina Kobanî, serkeftina hemû cîhanê bû li hember terora DAIŞê ku metirsiyeke cîhanî ye. Her wiha maskeya derewîn a dewleta tirk û piştgirî ya ji DAIŞ’ê re aşkera bûn. Dewleta tirk hêvi dikir ku DAIŞ bi ser bikeve û Kobanê û tevahiya Rojava ku qada şoreşa jinan e bixe bin kontrola xwe û sîstema demokratîk û piralî ya li wir hatiye avakirin têk bibe.
Jin û YPJ’ê di parastina Kobanê de roleke pêşeng lîstin, weke Arîn Mîrkan ku di nava çeteyên DAIŞ’ê de xwe teqand da ku pêşî li pêşveşûna wan bigire û rêhevalên xwe xelas bike. Bi çalakiyên xwe yên milîtanî û wêrek bû sembola berxwedanê. Çalakiya wê di têkoşînê de bû xala serkeftinê. Kobanê hat rizgarkirin û bajarê wêrankirî ji aliyê gel ve ji nû ve hat avakirin.
Têkçûna DAIŞ’ê û serkeftina YPG û YPJ’ê ji bo dewleta tirk bû birîneke kûr.
Ji ber vê yekê dewleta tirk hewl dide ku tiştê DAIŞ’ê li herêmê nekarî pêk bîne, bi xwe pêk bîne û êrîşî Kobanê dike. Êrîş û gefên Tirkiyeyê yên ji bo dagirkirina Kobanê gelek tund in.
Di 23’ê hezîrana 2020’an de li Halincê di êrîşa balafirên bêmirov ên dewleta tirk de 3 rêhevalên me, 3 endamên Kongra Star, 3 jinên ku jiyana xwe bi têkoşîna ji bo mafên jinan û demokrasiyê de derbas kirine şehîd bûn. Ev komkujî asta hovîtiya dewleta tirk û êrîşên wê yên hedefkirî yên li ser jinan nîşan dide. Tişta ku em îro dibînin şahid bi gef û hewlên dagîrkirina hermên me û êrîşa bi firokeyên bê mirovan li ser sivîlan, ne tiştekî din e ji bilî hewldana tolhildana DAIŞ’ê û têkbirina îradeya û moralê gel.
Berxwedana li Kobanê û tevahî bakur û rojhilatê Sûriyeyê ji ber gef û êrîşên dewleta tirk a dagirker ên li dijî gelê sivîl berdewam dike. Di vê rojê de em bang li hemû hêzên demokratîk û aştîxwaz û hemû rêxistinên jinan ên cîhanê dikin ku li dora berxwedanê kom bibin û ji bo têkbirina hêzên faşîst, dîktator û bavikslar careke din rabin ser pêyan.”
