Dewleta tirk piştî ku cezayê girtinê heta 22 sal û 3 mehan li têkoşer hevserokê KCD’ê Leyla Guven birî, êvara duşema borî ew girt û şand girtîgehê.
Girtina Guven rastî bertekên tund ên tevgerên jinan ên demokratîk ên li Kurdistanê û derveyî welêt hat. Têkildarî mijarê, Kongreya Star a Hesekê daxuyaniyek da.
Di daxuyaniyê de wiha hat gotin: “Bi navê Kongreya Star a kantona Hesekê û hemû rêxistinên jinan û jinên ji hemû pêkhateyan, bi yekdengî em binpêkirinên dewleta faşîst a tirk li herêmên Bakur û Rojhilatê Sûriyeyê û yên li dijî jinan û bi taybetî jinên kurd, şermezar dikin.”
Di daxuyaniyê de hat destnîşankirin ku hikûmeta tirk rojane li dijî jinên kurd û li pêş çavên cîhanê binpêkirinan pêk tîne, mînaka wê yekê hedefgirtina Hevrîn Xelef, Zehra Berkel û bi sedan şehîdên din in ku ji bo azadiya jinan têdikoşiyan.
Kongreya Star diyar kir ku sala borî têkoşer Leyla Guven ji bo şikandina tecrîda li ser Rêberê Gelê Kurd Abdullah Ocalan, zêdetirî 200 rojan ketiye greva birçîbûnê ya bêdem û bêdorveger Û wiha got: “Leyla Guven bandoreke mezin li ser tevahî cîhanê kir, ji lewra îro dewleta tirk wê dike hedef. Beriya vê jî gelek caran bi behaneyên bê bingeh hatibû binçavkirin. Ev nîşan dide ku dewleta tirk dijmina tevgera jinan e.”
Her wiha di dawiya daxuyaniya xwe de hat diyarkirin ku ew ê li hemberî wan biryaran bêdeng neminin û bang li rêxistinên mirovî û navneteweyî kir ku li hemberî biryarên ne adil bikevin tevgerê û Guven di zûtirîn dem de azad bikin. HESEKÊ
