Hepsîyo bi nameyê Erdal Kotanî Zîndanê Asayîşo Berz yê Hûmara 1. yê Xarpêtî de tewqîfkerde yo. Selahîyetdarê zîndanî 13 rojan cezaya hucreyî dayî Kotano ke grevê vêşanîye de bî û Kotanî kewto 43 kîloyan
Hepsîyo bi nameyê Erdal Kotanî Zîndanê Asayîşo Berz yê Hûmara 1. yê Xarpêtî de semedê şikitişê tecrîdê serê Rayberê PKKyî Abdullah Ocalanî kewtbî grevê vêşanîye. Seba ke Kotanî kewtbî grevê vêşanîye û kewto 43 kîloyan, raştê cezaya hucreyî ame.
Rayîrberîya Zîndanî seba ke Kotanî kewto grevê vêşanîye 13 rojan cezaya hucreyî daye ci. Rojnameger Îdrîs Yilmazo ke tewrê Erdal Kotanî tewqîfkerde yo bi rayîrê mektuba xo malumat da. Yilmazî da zanayene ke Kotanî raştê ceza ameyo û zextê serê hepsîyan zêdîyayo. Yilmazî dîyar kerd ke zîndan de xeylê neheqî û bêhuqûqî estî û xeylê hepsîyê nêweş nêerşawîyenî nêweşxane. Yilmazî ard ziwan ke selahîyetdarê revîrî tena ameyî hucre, hepsîyan ra nimuneya gonî girewtî û tena hebê vîtamînê B12 û Dyî dayî înan û şîyî.
Yilmazî mektuba xo de da zanayene ke xeylê hepsîyê nêweş yê ke rewşa weşîya înan xirab a estî û wina va: “Erdal Kotan çalakîya grevê vêşanîye ra dima kewt 43 kîloyan. Gozekê lingî û kevdikanê lingê ci masayî. No embazê ma çalakî ra ver faks erşawitbî Kongreya HDPyî ya Dêrsimî. Cok ra raştê cezaya hucreyî ame. Cezaya hucreyî ke ci rê ameybî birnayene 17ê temmuze de peynî bî. Rewşa weşîya embazê ma zaf giran a.”
Yilmazî tewr peynî dîyar kerd ke mektubê ke ci rê yenî erşawitene bi hawayo keyfî nînê dayene û va: “Tîya de xeylê problemî estî û seba ke beno ke nuştişê probeman vera mektuba mi nêresîyo destê şima, ez înan nênusena.” AMED
