Hevşaredarên Şaredariya Hezexê Sengul Erden û Mûrat Şen yek ji sembolên xespa qeyûman, kozikên tîmên taybet ên li ser banê şaredariyê rakirin. Hevşaredar Erden ji bo vê rewşê wiha got: “Ez heyîrî mam. Gotinekê ku vê rewşê vebêje nîne.”
Hikûmeta AKP-MHP’ê bi awayekî bêhiqûqî û bi zordarî, hema hema hemû şaredariyên Partiya Herêmên Demokratîk (DBP) xesp kirin. Li şaredariyên ku xesp kirin jî qeyûm tayîn kirin. Qeyûmên AKP-MHP’î ku bi îradeya gel nehatibûn hilbijartin, weke karê destpêkê li derdorên şaredariyan bloqên betonan û dîwarên mezin çêkirin û li ber deriyên wan jî noqteyên kontrolê yên polîsan ava kirin. Kesên ku diketin şaredariyê di lêgerînê de dihatin derbaskirin û li GBT’ya wan dihat nihêrîn.
Ev yek jî têra qeyûman nekir. Qeyûmê Şaredariya Hezex a Şirnexê li ser avahiyê şaredariyê kozikên tîmên taybet ava kiribûn. Bi vê yekê re qeyûman qereqol jî derbas kirin. Lê emrê qeyûman gelek dirêj nebû. Piştî tayînkirina qeyûman, di hilbijartina yekemîn de qeyûm hatin têkbirin. Yek ji şaredariyên ku careke din gel bi dest xistî jî Şaredariya Hezexê bû. Weke hemû qeyûmên AKP-MHP’ê, qeyûmê Hezexê jî li pey xwe gelek bermahiyên sosret hiştin. Kozikên ku li ser avahiya şaredariyê hatin avakirin jî dê weke gelek pêkanînên din, yek ji sembolên qeyûman di dîrokê de cihê xwe girt.
Hevşaredarên Şaredariya Hezexê yên Partiya Demokratîk a Gelan (HDP) Songul Erden û Mûrat Şen piştî ku bi îradeya gel hatin hilbijartin, weke yek ji karên destpêkê kozikên tîmên taybet ên li ser banê şaredariye rakirin. Xebatkarên şaredariyê kozikên ji kîsên xîz hatibûn çêkirin, anîn xwarê. Hevşaredar Erden vê rewşa bi vê hevokê vedibêje: “Em pir heyîrî man. Gotineke ku mirov ji bo vê rewşê bibêje nîne.” ŞIRNEX
