Navenda Nûçeyan |
Êrîşa faşîst a li dijî xebatkara HDP’a Îzmîrê Denîz Poyraz li gelek bajaran hat protestokirin.
Çalakiya li Wanê li pêşiya avahiya HDP’ê ya Wanê hate kirin. DBP, TJA, Komeleya Jinan a Starê, DÎSK, Platforma Şaxên KESK’ê, OHD, TÛHAY-DER, Odeya Tabîban a Wanê û Colemêrgê jî di nav gelek kes tev li çalakiyê bûn.
Hevseroka HDP’a Ebexê Gonul Uzunbay diyar kir ku partiya wan bi mehan e ji aliyê serokkomarê tirk, wezîrê karê derve û MHP’ê wekî hedef tê nîşandan û wiha got: “Demeke dirêj mudaxeleyî kujer nehatiye kirin û di êrîşê de xebatkara me ya partiyê Denîz Poyraz hatiye kuştin. Ew ê rojekê dewran bigere, wê AKP hesap bide gel.”
RIHA
Dayikên Aştiyê, rêveberên bajêr ên HDP’ê û gelek endamên partiyê tev li çalakiya HDP’a Rihayê bûn.
Hevseroka HDP’ê ya Rihayê Çîgdem Karakeçîlî, Denîz Poyraz bi bîr anî û wiha got: “Li Îzmîrê qetlîamek hate kirin. Em vî tiştî qebûl nakin. Em ê têkoşîna xwe geştir bikin.”
Endamên HDP’yî yên Meclisa Şaredariya Bajarê Mezin a Rihayê jî nerazîbûn nîşanî êrîşê dan û ji civîna meclisê derketin.
EDENE
HDP’a Edeneyê jî li Parka Înonuyê daxuyanî da û kuştina Denîz Poyraz şermezar kir. Nûnerên HDK, CHP, EMEP, DAD û ÎHD jî di nav de gelek kes tev li çalakiyê bûn. Hevserokê HDP’ê yê bajêr Mehmet Karakiş diyar kir ku tu qetlîam ew ê wan nede sekinandin. Gel piştre çalakiya rûniştinê li dar xist û sloganên ‘Bijî berxwedana HDP’ê’ û ‘HDP gel e û gel li vir e’ berz kir. Çalakger piştre heta ber avahiya HDP’ê ya bajêr meşiyan.
