Navenda Nûçeyan
Piştî ku zexta siyasî ya Polîsên Ewlehiyê ya Swêd (SAPO) li ser kurdan zêde bû û kurdên ku daxwaza îltîcaya siyasî dikin bi hevkariya bi dewleta tirk re teslîmî MÎT’ê dikin, helwest zêde dibe.
Partiya Çepgir li ser dersînorkirina Zozan Buyuk a Kurdistanî ku dayika 2 zarokan e, helwest nîşan da, zext û cihêkariya li ser kurdan anî rojeva parlamentoyê. Her wiha şaredariyên Partiya Çepgir ji bo piştevaniya bi Zozan Buyuk û ji bo ku PKK ji lîsteya terorê were derxistin kampanya dane destpêkirin.
Şaredarî axaftinên xwe bi vîdeoyê qeyd dikin û li ser malperya înternetê ya Partiya Çepgir a Orebo par ve dikin.
Endama Meclîsa Şaredariya Uppsala Vîctorîa Mork got ew qebûl nakin ku Zozan Buyuk were dersînorkirin û diyar kir ji ber kokên wan ên etnîk mirov nikarin werin krîmînalîzkirin.
Seroka Koma Partiya Çepgir a Şaredariya Helsînborgê Jenny Bjorklund Hansson jî got, ”Em Partiya Çepgir a Helsînborgê krîmînalîzekirina kurdan û rêxistina wan protesto dikin.”
Endamê Meclîsa Şaredariya Upssala Tobîas Smedberg jî got, ”Li Swêd û Ewropayê gelek kurd di vê rewşê de ne. Kurdan û rêxistina wan reş dikin. Em piştevanê Zozan û kurdên din in û em dixwazin dawî li vê cihêkariyê were.”Smedberg her wiha xwest ku PKK ji nav lîsteya terorê were derxistin.
Seroka Koma Partiya Çepgir a Orebro Martha Wîcklûnd jî ,”Ez qebûl nakim ku kurd û rêxistina wan were krîmînalîzekirin” û li dawiya axaftina xwe de got, ”Kurd ne terorîst in.”
