Bi serkêşîya Kongreya Komela Demokratîke (KCD), Kongreya Demokratîke ya Şaran (HDK), Tevgerê Cinîyanê Azadan (TJA), Partîya Herêmê Demokratîkî (DBP) û Partîya Keske şayîya Newroze yena viraştene. Newroza 2023yî bi şîarê “Her der Newroz, Her dem Azadî” û “Bi adirê Newroze ver bi azadîye ” yena pîrozkerdene.” Aktîvîteyanê Newroze de rîyê erdlerzî ra hunermend û qiseykerdoxî pê kincanê sîyayan vejiyenê sahne ser û sahneyê Newroze de pankartê sîyaye yenê daliqnayene. Newroza emserrî de kesê ke erdlerzî de merdî yenê yadkerdene û tewirê îqtîdarî yê erdlerzî yeno şermizarkerdene.
Adiro verên ê Newroze 15ê adare de Şemzînanê Colemêrgî de ame wekerdene.
Dima ra zî 19ê Adare yanî vizêr Dêrsim, Çewlîg, Êlih, Sêrt, Îdir, Wan, Mûş, Anqara, Mersin, Antalya, Îzmîr, Aydin, Mugla, Denîzlî, Manîsa, Bursa, Stenbol, Qoser, Balikesîr-Ayvalik, Kocaelî-Gebze, Tetwan, Gever û Sakarya Arîfiye de adirê Newroze ame wekerdene û Newroze bi coşêk gird û reaksîyonê hemverê îqtîdarî ameye pîrozkerdene.
Ewro yanî 20ê Adare de zî Mexmûr, Qers, Colemêrg, Xarpêt-Dep, Agirî, Erdexan û Erzirom-Qereyazî de adirê Newroze ame wekerdene. Ewro zî şar raşteyanê Newroze deker û şar kiştêk de şînê kesê ke bobelatê erdlerz û laserî de dinyaya xo bedilnayî tepişt û kişta bîn de zî îqtîdarî şermizar kerd ke bobelatan de berpirsîyarîya xo nêard ca û mergan ra berpirs o.
Mexmûr
Kampa Koçberan ya Şehîd Rustem Cûdîyî de Newroze bi coş û heyecanêk gird ameye pîrozkerdene. Newroze bi rêzgirewtişî dest pêkerd û dima Hemsereka Meclîsê Şarî Fîlîz Budake qisey kerd. Budake qiseykerdişê xo de da zanayene ke do bi siloganê ‘Xoverdayîş cuye yo’ ser bikewî û bale ant weçînayîşo ke do 14ê Gulane de pê bêro ser û wina vat: “Newroze adirê serewedarnayîşî ya. Qiseykerdişan ra dima bernameyê pîrozkerdişê Newroze hetê keyeyanê şehîdan ra bi wekerdişê adirê Newroze dest pêkerd. Berpirsê Komîteya Hizba Şuî Kurdistanî yê Mexmûrî Hawrê Cehfer Seyda sahne ser de qisey kerd û Newroza kampe pîroz kerd. Qiseykerdişan ra dima Hunermend Hesen Rênas vejîya sahne û deyîran vat. Koma govende ya domananê Mexmûrî zî bi girewtişê govende coşê şarî berz kerd. Bername badê deyîr û govendan peynî bî.
Qers
Şarê Qersî vera hewayo serdin reyna zî raşteyê Newroze pir kerd û bi wekerdişê adirê Newroze xo germ kerd. Şar seba pîrozkerdişê Newroze saetanê serê sibayî de verê xo da Garê Qersî. Dew û qezayan ra şar herikîya merkezê Qersî û bi deqeyêk rêzgirewtişî bernameyê pîrozkerdişê Newroze dest pêkerd. Newroze de hukmat ame şermizarkerdene û dormeyê adirî de govend ame girewtene. Parlamentera Partîya Demokratîke ya Şaran (HDP) Gulistan Kiliç Koçyîgîte Newroze de qisey kerd û vat: “No îqtîdar rantwer, no îqtîdaro ke merdim û xozaye çinî hesibneno ma kişt. Ma heqê xo şima rê helal nêkenê. Şima do hesab bidî.”
Colemêrg
Colemêrg de bi hezaran kes herikîya raşteyê Newroze. Bi coş û heyecanêk gird şar verê xo da Koyê Simbîlî û şî raşteyê Newroze. Hema saetanê serê sibayî de hemwelatijî bi kincanê xo yê herêmîyan raşteyê Newroze pir kerd. Xeylê kesî bi flamayanê rengê keske sûre û zerde dekewt raşteyê Newroze. Bernameyê Newroze bi deqeyêk rêzgirewtişî dest pêkerd. Serekwekîla Koma HDPyî Meral Daniş Beştaş û parlamenterê HDPyî yê Colemêrgî Saît Dede qisey kerdî. Dimayê qiseykerdişan Koma Sorjiyane vejîya sahne ser. Zafê hemwelatijan kincanê xo yê herêmîyan xora dayî. Tay esnafî zî seba pîrozkerdişê Newroze derabeyê dikanê xo nêakerdî. Wezîfedarê Newroze zî seba qurbanîyanê bobelatê erdlerzê Mereşî û laserê Riha û Semsûrî kincanê sîyayan xora da. Qiseykerdişê Merale ra dima mektuba Hemşaredarê Colemêrgî ya verêne Dîlek Hatîpogluye ameye wendene. Wendişê mektube ra dima adirê Newroze ame wekerdene û siloganê “Biciwîyo Serek Apo” ame berzkerdene. Bernameyê pîrozkerdişî bi deyîranê Koma Sorjiyane qedîya.
Xarpêt-Dep
Qezaya Depî ya Xarpêtî de zî adirê Newroze bi girseyî û heyecanêk gird ame wekerdene. Qiseykerdişan de tewirê îqtîdarî ame şermizarkerdene û dîya zanayene ke no şar do weçînayîşê 14ê Gulane de hesab biperso û îqtîdarî bişirawo serê eşteyê tarîxî ser. Qiseykerdişan de tepişteyê sîyasî Leyla Guven, Ayla Akat Ata, Selçuk Mizrakli, Îdrîs Balukenî rê silam ame şirawitiş û vajîya ke sebebê bîlançoya girane ya erdlerzî îqtîdarê AKP yo. Parlementerê HDPyî Nejdet Îpekyuz û Endama Meclîsê Partîya Herêmê Demokratîkî (DBP) Asya Kalçake qisey kerd. Îpekyuzî qiseykerdişê xo de vat: “Kawayî hemverê Dehaqan, Mazlumî hemverê zilimkaran de sere wedarna û ser kewt. Ewro zî roje roja ma ya. Ma do zî ser bikewî. Ma do hesab bipersî. Ê seba pere her çîyî rot. Ma do pîya xover bidî.” Bernameyê pîrozkerdişî bi deyîranê hunermend Ehmed Jiyara peynî bî.
Agirî
Bi hezaran hemwelatîyê Agirî seba wekerdişê adirê Newroze herikîya Parka Newroze. Saetanê serê sibayî de dew, qeza û merkezî ra bi hezaran hemwelatijî verê xo da raşteyê Newroze. Raşteyê Newroze bi flamayanê keske sûre û zerde xemilîya. Bade cigêrayîşê raşteyê Newroze destur dîya ke şar dekewo raşte. Ciwanan nîşaneyê serkewtişî berz kerd û derheqê Rayberê PKKyî Abdullah Ocalanî de siloganan berz kerd. Bernameyê Newroze seba kesê ke têkoşînê demokrasî, erdlerz, laser û Qirkerdişê Helebçeyî de dinyaya xo bedilnayî yew deqa rêzgirewtiş ame tepiştene. Parlamenterê HDPyî yê Wanî Sezaî Temellî û Parlamentera HDPyî ya Agirî Dîlan Dîrayet Taşdemîre qisey kerd. Bername badê deyîranê Koma Dengê Meymane peynî bî.
Erdexan
Newroze ewro Erdexan de zî bi tewrbîyayîşê hezaran ameye pîrozkerdene û bi deqeyêk rêzgirewtişî bernameyê Newroze dest pêkerd. Newroze de kesê ke erdlerzî de merdî ameyî vîrardene û veng dîya ke wa şar 14ê Gulane de no îqtîdaro ke bi gonîya şarî ra weye beno û destgonîn o çinî bikero. Parlamenterê HDPyî Murat Sarisaç Newroza Erdexanî de qisey kerd û bale ant weşînayîşê ke do bêro viraştene ser û vat: “Do no şar 14ê Gulane de hem hesabê qurbanîyanê erdlerz û laserî, hem zî do hesabê Kemal Kurkutî ke Newroza Amedî de ame qetilkerdene biperso.”
Erzirom-Qereyazî
Adirê Newroza Qereyazî ya Erziromî bi siloganê ‘Her ca Newroze her dem azadî’ ame wekerdene. Pîrozkerdiş raşteyê weng yê rêxistina Partîya Demokratîke ya Şaran (HDP) yê Qereyazîyî de ame viraştene. Vera hewayo serdin bi hezaran kes tewrê Newroze bî. Bernameyê Newroze bi deqeyêk rêzgirewtişî dest pêkerd û dima ra qurbanîyê bobelatê erdlerz û laserî ameyî yadkerdene.
Siba 21ê Adare de zî do Amed, Cizîr, Çanakkale, Balikesîr-Bandirma, Erdexan-Gole, Bazîd û Nisêbîn de Newroze bêra pîrozkerdene.
