Çalakîyanê nobete yê vera destsernayîşê Şaredarîya Colemêrgî vizêr roja şeşine de dewam kerd.
Anqara
Hêzanê Kede û Demokrasîyî vera destsernayîşî eşkerayîye daye. Eşkerayîye de sloganê ”Bijî berxwedana gelê kurd” ame vatene. Vervatoxa Meclîsê Cinîyan ê DEM Partî yê Anqara Nebahate Çalpan eşkerayîye wende û îfade kerd ke ê do destûr nêdê ke îradeyê şarê kurdî çin bêro hesibnayene.
Adana
Rêxistina DEM Partî ya Adana vera destsernayîşî roja çarine de nobete rê dewam kerd. Hemserekê DEM Partî ya Adana Seyfettîn Demîrî çalakîye de qisey kerd.
Sêrt
Verê Şaredarîya Sêrtî de çalakîya nobete roja şeşine de dewam kerd. Verê Şaredarîyanê Misirc, Hawêl û Weysel Qeranîyî de zî çalakîyî est bîyî.
Êlih
Çalakîya nobete ya verê Şaredarîya Êlihî vizêr roja xo ya şeşine temam kerde. Xeylêk kesî tewrê çalakîye bîyî û bi berzkerdişê sloganan vera destsernayîşî nêrazîbîyayîşê xo mojna.
Şirnex
Rêxistina DEM Partî ya Şirnexî derheqê rayraşîyayîşê 13ê hezîrane de verê Şaredarîya Silopî de eşkerayîye daye. Wekîle Newroze Uysal û îdarekarê DEM Partî-DBPyî zî tewrê eşkerayîye bîyî. Eşkerayîye de venga pêro kesan dîya ke wa tewrê rayraşîyayîşê 13ê hezîrane bibê. Girseyî dima verê şaredarîye de dest pê nobete kerd.
