Kurdistanî û dostên wan ên li Amsterdam, Graz û St. Gallenê ji bo şermezarkirina êrîşên dagirkeriyê yên dewleta tirk û çeteyên wê çalakî li dar xistin. Di çalakiyan de xwepêşanderan piştgiriya xwe ya bi Rojava re anîn ziman
Li paytexta Hollanda Amsterdamê, li bajarê Grazê yê Awusturyayê û li bajarê St. Gallen ê Swîsreyê kurdistanî û dostên wan ji bo şermezarkirina êrîşên dagirkeriyê yên dewleta tirk û çeteyên wê çalakî li dar xistin.
Di vê çarçoveyê de kurdên li bajarê Amsterdamê tevî dostên xwe li meydana Damê li hev kom bûn û piştgiriya xwe ya bi Rojava re nîşan dan. Di mîtîngê de gelek holandî û nûnerên rêxistinên civaka sivîl jî amade bûn. Di çalakiyê de axaftvanan dagirkeriya dewleta tirk şermezar kirin û ji bo Rojava banga piştgiriya enternasyonalîst kirin.
Çalakiya li Grazê
Bi heman boneyê kurdistanî û dostên wan ên li bajarê Graz ê Awusturyayê jî mîtîngek li dar xist. Di mîtîngê de dagirkeriya dewleta tirk hate şermezarkirin û ji bo piştgiriya bi Rojava re belavok hatin belavkirin.
‘Ji St. Gallenê heta Rojava şoreşê biparêze’
Li kantona St. Gallen a Swîsreyê jî bi pêşengiya Tevgera Ciwanên Şoreşger û ciwanên enternasyonalîst meşek hat lidarxistin. Di meşê de pankartên ‘Piştgiriya bi berxwedana Rojava re’ û ‘Ji St. Gallenê heta Rojava şoreşê biparêze’ hatin hildan.
