Paytextê Fransa Paris de 23ê kanûne de hêrişê çekdarî yê vera Merkezê Kulturê Kurdan ê Ahmet Kayayî de Endama Konseya Rayberdişî ya KCKyî Emîne Kara (Evîn Goyî), Endamê Tev Çandî Mîr Perwer û welatperwer Abdurrahman Kizil ameyî qetilkerdene. Hemsereka KCDK-E Fatoşe Goksungur derheqê merasîmê cenazayanê qurbananê Qirkerdişê Parisî yê 23ê Kanûne û çalakîyan de ANFyî rê qisey kerd.
Goksungure vist vîrî ke Qirkerdişê Parisî yê 9ê Çeleyê 2013î de 3 cinîyê şorişgêrî Sakîne Cansiz, Leyla Şaylemez û Fîdan Dogan ameybî qetilkerdene û rixmê çalakîyanê şarê kurdî zî dewleta Fransa raştîyê nê qirkerdişî qetî eşkera nêkerdî. Goksungure vat: “Serrgêra 10. ya Qirkerdişê 9ê Çeleyî de Paris de qirkerdişêko bîn ame kerdene. Seba ke hesabê qirkerdişê verênî nêame perskerdene no qirkerdişo diyîn ame kerdene. Rixmê hende nêrazîbîyayîşan zî dozgerîya Fransa û tay selahîyetdaranê Fransa no qirkerdiş sey hêrişêkê nijadperestî pênase kerd. Dewleta Fransa de di klîkî est ê; klîkê gladyo-dewleta xorine û klîkê dewleta huqûqî. Klîkê gladyoyî xîret keno ke serê nê qirkerdişî bigêro. Seba kurdan babetêka hesas a ke ganî no qirkerdiş bêro roşnîkerdene.
Nê qirkerdişî de zî hetê hişmendîya dewleta tirke ra têgêrayîşê cinîyan û cinîya kurde ameye hedefkerdene. Evîn Goyî seba ke vera DAIŞî şer kerdbî ameye hedefkerdene. Cinîyê kurdî yê xoverdayoxî tim wina yenê qetilkerdene. Bi serewedaritişê Rojhelatê Kurdîstanî û Îranî sloganê ‘jin, jiyan, azadî’ pêro dinya de vila bi. Polîtîkayê kolonyalîstî tradîsyonê dewleta tirke yê. Coka embaze Evîne zî şexsê cinîyan ê kurdan de reya diyîne sey Sakîne, Fîdan û Leyla Paris de ameye hedefkerdene.”
Goksungure da zanayene ke roja qirkerdişî ra nata ê Merkezê Kulturê Kurdan ê Ahmet Kayayî de nobeta edaletî gênê û vat: “Ma do 3ê çeleyî de şehîdanê Qirkerdişê 23ê Kanûne bi merasîmêkê pîlî bişawê Kurdistanî. Sere de Paris û dormeyê ci ra pêro Fransa ra merdimî do tewrê merasîmî bibê. Ma venga pêro kurdistanijan û dostanê xo danê ke tewrê nê merasîmî bibê û wayîrê şehîdanê xo vejîyê. 7ê çeleyî de zî seba Sakîne Cansiz, Leyla Şaylemez û Fîdan Dogane ma çalakîyî cara organîze kerdbî. Embaze Evîne zî plankerdiş de cagirewtbî. Rayraşîyayîş û mîtîngê 7ê çeleyî de şarê ma her cayê Ewropa ra bêro. Reyna ma venga şarê xo danê ke bi ruhê xoverdayîşî tewrê nê çalakîyan bibê.” PARIS
