Rayberê PKKyî Abdullah Ocalan 26 serrî yo binê tecrîdêk giran de yeno tepiştiş û 35 aşmî yo tu xeberêke ci ra nîna girewtiş. “Delegasyonê Mîyanneteweyî yê vera tecrîd û seba çareserîya problemê kurdî” ke 12 avûkatanê Swêd, Başûrê Afrîkayê, Ispanya, Îtalya û Norveçî ra pê yeno, vera tecrîdî de mabenê 28-29ê Sibate de Amed de zîyaretan pê ard. Heyet 1ê Adare de bi temsîlkarê komelê sivîl û avûkatê Baroyê Huqûqî yê Asrinî yê Stenbolî zîyaret kerd û 2yê Adare de şûbeyê OHDyî yê Beyogluyî yê Stenbolî de otelêk de konferansê “Vera sîyasetê tecrîdî de têkoşînê aştî û azadîye” pê ard.
Endama ‘Delegasyonê Mîyanneteweyî yê vera tecrîd û seba çareserîya problemê kurdî’ û Baroyê Stockholmî avûkate Lena Charlotta Lagnnandere deheqê zîyaterî de û xebatê ke do welatê xo de rayîr ra biba de JINNEWSî rê qisey kerd.
Derheqê tecrîdê Îmraliyî de malumat arê dayî Lenaye da azanayîş ke aye avûkatêka bi heqê merdiman bawer kena ya û wina vat: “Her merdim wayîrê heq o ke bi adilane û asayîş bêro muhakemekerdiş. Bi taybetî heqê tepişteyan est o. Ma zanê ke Ocalan û tepişteyê bîn ê Îraliyî û tepişteyê polîtîk înan heqan ra bêpar manenî. Coka ra ma pîya ameyî tîya û ma malumat arê da û cigêrayîş kerd. Wexto ke ma agêrî welatê xo, ma do înan malumatan pare bikerî.”
Seba grevê vêşanîye paştîdayîş
Lenaye ercnayîşê ‘tecrîd raybazêk îşkenceyî yo’ kerd û wina vat: “Dinya de tepişte ya zî nêtepişte ganî tu kes binê caardişan reyde nêro rî bi rî. Hemverê tepişteyê sîyasî de surgun ra bigêrêne heta xeylê binpaykerdişê heqan, her tewir binpaykerdiş yeno kerdiş. Na rewşe nîna qebûlkerdiş. Ez grevê vêşanîye yê tepişteyan fehm kena. Ez bi înan reyde empatî kena. Semedo ke her çî destê înan ra ameyo girewtiş, tewr peynî ameyî nuqtayêke winasî.”
‘Ma do welatê xo de cehd bikerî’
Lenaye dewamê qiseykerdişê xo de da zanayîş ke seba Tirkîya peynîya polîtîkayanê xo bîyara, ganî teda bêra kerdiş û vat: “Kombîyayîş û zîyaretan de qiseykerdişê ma derheqê tecrîd û çarserîye de bî. Tirkîya girêdayeyê huqûqê mîyanneteweyî nêmanena. Goreyê huqûqê mîyanneteweyî tênêgêrena. Ganî mekanîzmayê mîyanneteweyî teda bi Tirkîya bikerî. Ganî Erdoganî rê bêro vatiş ke çîyê ke yenê kerdiş nînê qebûlkerdiş. Wexto ke ma agêrenê welatê x oma do raşteyê polîtîk û komelê sivîl de xebatan rayîr ra bibî û rêxistibîyayîşêk xurt awan bikerî. Şarê Swêdî nika nêzano ke tepişteyê Tirkîya çi ciwîyenê. Wexto ke ma agêrî ma do hîna hîra qalî bikerî.”
‘Azadîya Abdullah Ocalanî muhîm a’
Lenaye qiseykerdişê xo yê peyênan de dîyar kerd ke çareserî bi azadîya Rayberê PKKyî Abdullah Ocalanî mumkun o û wina peynî kerd: “Abdullah Ocalan rayberê şarê Kurdî yo. Coka ra azadîya fîzîkî ya ci muhîm a. Heta azadîya ci ya fîzîkî pê nêra do seba aştîye zî gam nêra eştiş. Ganî sey verê cû pêvînayîşê bi avûkatan bêra kerdiş û tecrîd raşte ra bêro wedariş. Ganî vera nê caardişan de Ewropa û dinya venga tedaye bika berzkerdiş.” STENBOL
