Li bajarên bakurê Kurdistanê binpêkirinên hilbijartinê dest pê kirin. Di vê çarçoveyê de jî li navçeyên Şirnexê leşkeran zext li hilbijêran kir ku neçin ser sindoqan an jî dengê xwe bidin AKP’ê. Her wiha leşkerên ku ji derve anîn bajar, bi komî deng dan. Li gundê Osyan ên Sêrtê jî leşker zextê li şêniyên gund dike
Bi destpêkirina hilbijartina rêveberiyên herêmî re binpêkirinên li bajarên bakurê Kurdistanê jî dest pê kirin. Bi dehhezaran leşker û polîsên ku derdora dibistanan dorpêçkirin, zextê li gel dikin û hewl didin bandorê li hilbijêran bikin.
Hat zanîn ku li gundê Osyan ê Sêrtê leşkerên tirk bi awayekî vekirî zextê li gundiyan dikin da ku dengê xwe bidin AKP’ê. Şêniyên gund diyar kir ku piştî berteka şêniyan jî di navbera wan û leşkeran de rageşî derketiye. Rageşiya di navbera welatiyan û leşkeran de didome.
Binpêkirinên li Şirnexê
Li Êlkê ya Şirnexê jî leşkerên ku bi wesayîtên zirxî hatin veguhestin, tevî ku peywirdar nebûn jî xwestin ku bi unîformayên xwe deng bidin. Li ser mudaxaleya peywirdarên sindoqê yên HDP’ê jî neçar man ku unîformayên xwe derxînin. Hêjayî bibîrxistinê ye ku beriya hilbijartinê, dengê bi hezaran leşker û polîsan bi awayekî nelirê biribûn Şirnex û navçeyên wê. Leşkerên ku bi wesayîtan anîn Dibistana Seretayî ya Edîp Başar, di bin tedbîrên ewlehiyê yên zêde de bi awayekî komî deng dan. Leşkeran nehiştin ku rojnameger wêneyên wan bikişînin.
Li Qesrik a Şirnexê ku piraniya wê cerdevanin jî, ji bo ku welatî neçin ser sindoqan zext li hilbijêran tê kirin. Li dibistanê bi dehan leşker hatine bicihkirin û vê yekê jî rê li ber nerazîbûna welatiyan vekir.
‘Ji bo polîsan a girîng dorpêçkirina sindoqan e’
Li navenda Amedê jî 8 hezar 340 jê polîs û 10 hezar 364 jê leşker, bi giştî 18 hezar 704 hêzên çekdar ên dewleta tirk ji bo parastina sindoqan hatin peywirdarkirin. Polîsên ku ji 20’ê mijdara sala 2018’an ve li ber avahiya HDP’ê ya Amedê hatibûn bicihkirin, îro vekişiyan. Rêveberên HDP’ê der barê mijarê de axivîn û ev rewş wiha nirxand: “Ji bo polîsan îro ya girîng ew e ku sindoqan dorpêç bikin.”
