Şeva din saet di 24:00’an de dema ku 2 koman; 4 mêr û 24 kes ku di nav de jin û zarok hebûn ku piraniya wan ji Qamişloyê ne, hewl didan di sînor re derbasî bakurê Kurdistanê bibin, leşkerên tirk ên li ser sînor 2 kes ji wan; Ê.Ê (34) û N.H. (14) girtin.
Li gorî agahiyên ku her du ciwanan dane ajansa ANHA’yê leşkerên tirk li wan daye û ew ji ser dîwarê 4-5 metre bilind, avêtine xwarê.
Di dîmenan de rewşa xirab a her du ciwanan a ji ber îşkenceya dijwar xuya dibe. Ciwanên navborî ji serî, sîng û destên xwe birîndar bûne.
Li gorî N.H. ew komeke ji 4 kesan bûn û dema sînor derbas dikirin, leşkerên tirk ên li ser sînor gule li wan reşandine. N.H. wiha bûyer vegot: “2 kesên ji koma me reviyan, derdora saet 3:30’ê sibehê jî em hatin girtin. Çawa em girtin, hema li me dan. Destê min ê rastê şikandin.”
Li ser laşê N.H. şopên îşkenceya tund xuya dikin û rewşa wî giran e.
Ê.Ê. jî got her ku pirsek ji wan dikirin, bi alavan li wan didan û wiha dewam kir: “Dema ku li serê min dan, ez ji ser hişê xwe çûm.”
Li gorî N.H. û Ê.Ê. ew derdorê saet 8:00’ê vê sibehê ji ser dîwarê li sînor hatine avêtin. Çavkaniyekî xwedî agahî jî ragihand ku kesên ji koma duyemîn radestî malbatên wan hatine kirin.
Li gorî heman çavkanî, leşkerên tirk tecawiz zarokeke 11 salî û jineke 25 salî kiriye. QAMIŞLO
