Hemsereka Kongreya Komelê Demokratîkî (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke ke 4ê hezîrane de parlementerîya ci ameye destsernayene û dima ra ameye tepiştene, vizêr saetanê şanî ameye veradayene.
Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guven, û Parlementerê HDPyî yê Amedî Musa Farisogullariyî û Parlementerê CHPyî Enîs Berberogluyî yê ke parlementerîyê înan ameyî destsernayene dima ra cade ameybî tepiştene.
Guvena ke cezaya ci ra aşme û nîme mendbi bi sîstemê kontrolê serbestî hewce nêkerdêne bikewo zîndan la rixmê nê sîstemî ameyebî tepiştene û ameyebî şawetene Zîndanê Amedî. Murcatê avûkatan ra dima Guvene vizêr saetanê şanî de serbest ameye veradayene.
Guvene badê veradayîşî verê zîndanî de nê vatî: ”Ez vejîyaya la Musa Farisogullari sey bi hezaran tepişteyanê bînan hema zîndan de yo ke xeylêk nêweşîye ci yê giranî estê. Coka ez pê vejîyayîşê xo şa nêbena. Ma zanê ke no yew têkoşîn o. Ma kewenê herinda yewbînan. Heta serkewtişê şarê kurdî ma do têkoşîn bikerê û qet peyser game nêerzê. Ma sey wekîle/î nêameyê dinya. Ma do her tewir têkoşînê xo bidê domnayene. Kurdî bi serran o verê berê zîndanan de pawenê. Seba ke sûcê kurdan esto nê seba ke vera înan dişmenîye esta zîndanan de yê. Ma zaf hole zanê ke ma ça ra yenê û sera şinê. Wa şarê ma moralê xo mexeripno. Êyê ke tengayî de yê ma nêyî ê yê. Sey şarê rêxistinkerde ma do miheqeq ser bikewê. Şarê kurdî semedê azadîye çi wazeno do bifîno dest. Ê bi xo do vînî bikerê. Ma do kayanê înan rê mexapîyê. Ma sey Partîya Demokratîke ya Şaran têkoşînê xo rê dewam kenê. Xoverdayîş ciwîyayîş o.” AMED
