Hevseroka KCD’ê Leyla Guven bi munasebeta Roja Dayikan peyamek parve kir. Guven got ku bila tu kes bi gotinên dilşewat ên li dijî tundiya li dijî dayikên kurd tê kirin, wijdana xwe rehet neke. Guven diyar kir ku pêkanîna aştiyeke bi rûmet, soza wan a ji bo dayikan e
Hevseroka Kongreya Civaka Demokratîk (KCD) û parlamentera Partiya Demokratîk a Gelan (HDP) a Colemêrgê Leyla Guven ji bo rakirina tecrîda girankirî ya li ser Rêberê Gelê Kurd Abdullah Ocalan, 186 rojin di berxwedana greva birçîbûnê ya bêdem û bêdorveger de ye. Guven bi boneya Roja Dayikan peyamek parve kir.
Peyama Guven a bi munasebeta Roja Dayikan weşandî wiha ye: “Bila tu kes bi gotinên dilşewat ên li dijî tundiya li dayikên kurd tên kirin, wijdana xwe rehet neke. Ew dayik, ji bo çareserkirina pirsgirêkeke ku gelek siyasetmedaran nekarîn çareser bikin canê xwe danîne holê û rêyeke nû nîşanî me hemûyan dan. A ku dikeve ser milê me ew e ku em li ser wê rêyê bimeşin. Pêkanîna aştiyeke bi rûmet bila soza me ya ji bo wan be.” AMED
