Hevseroka KCD’ê Leyla Guven ku li nexweşxaneyê dihat dermankirin, ji nexweşxaneyê derket. Guven têkildarî mijarê wiha got: “Ji bo ku di demekî nêz de gelê xwe hembêz bikim, ez ê hîn xurtir vegerim.”
Li ser banga Rêberê Gelê Kurd Abdullah Ocalan, hevseroka KCD’ê û û parlementera HDP’ê ya Colemêrgê Leyla Guven di roja 200’emîn de dawî li çalakiya xwe ya greva birçîbûnê anî. Guven piştre jî li nexweşxaneyeke taybet a li Amedê dihat dermankirin. Leyla Guven piştî ku tedawiya wê li nexweşxaneyê bi dawî bû, ji nexweşxaneyê derket.
Têkildarî mijarê KCD’ê li ser malpera xwe ya fermî agahî parve kir û destnîşan kir ku Leyla Guven ji nexweşxaneyê derketiye lê dê kontrola wê ya tenduristiyê berdewam bike.
Keça Leyla Guven Sabîha Temîzkan jî der barê mijarê de li ser hesaba xwe ya twîtterê peyamek parve kir û wiha got: “Dayika min Leyla guven ji bo ku vegere rewşa xwe ya tenduristiyê ya berê, em neçar man ku heya demekê navber bidin serdanan. Niha silavên xwe ji hemû kesên ku dixwazin wê bibîn re dişîne. Dibêje, ‘Ji bo ku di demek herî nêz de di serî de gelê Colemêrgê, hemû gelê xwe hembêz bikim, ez ê hîn xurtir vegerim.’” AMED
