30ê temmuze de qezaya Meramî ya Konya de 7 ferdê keyeyê kurdî yê Dedeogullariyî hetê nîjadperesêkê tirkî ra ameybî qetilkerdene. Hemsereka Kongreya Komelê Demokratîkî (KCD) Leyla Guven Zîndanê Xarpêtî ra qirkerdişî ser o mektubêke şawite.
Mektuba Leyla Guven bi kilmî wina ya:
”Raşta zî Konya de kurdî estê?
Ez dejê keyeyê Dedeogullariyî pare kena û rêzê xo pêşkêşê şima kena. Vera hêrişê serê şima ma zaf hêrsbîyaye yê çunke ma semedê nê nasnameyê xo zaf dejê pîlî antî. Ê kesanê ke bîyê sebebê nê hêrişî vatêne se? ‘Ma way û bira yê, ma sey goşt û nêngî yê.’ Nê vateyî pêro zûr ê.
Ma qetî raşta zî nêbîyî way û bira. Ma sey kurdanê Anatolyaya Mîyanêne na raştîye hîna hol zanenê. 500 serrî verî ma şîyî Konya û ma qetî sey roniştoxanê nê wareyî nêhesibîyayî. Ma tim sey multecî hesibîyayî. Çunke ma tirk nêbîyî la ma nêeşkayî vajê ke ma kurd ê. Wexto ke ma wina vatêne no bîyêne sebebê cîyakerîye. Kesê ke vanê ma kurd ê pê parçekerdişê welatî yenê sûcdarkerdene. Nê welatî de ma hema zî yenê lînçkerdene.
La ma kam bîyî? Ma ê kurd ê ke seyan serrî verî ameybî asîmîlekerdene û surgunkerdene. Ma surgunê Antalyaya Mîyanêne bîyî. Dormeyê ma pê tirkan ame girewtene. Ma pê vateyanê faşîstan bîyî pîl.
Kesê ke keyeyê Dedeogullariyî qetil kerdî zanenê ke nê welatî de qirkerdişê kurdan sûc nîyo.Kesê serdarî kurdan sey sebebê pêro xirabîyan nîşan kenê.AKP-MHP tim kurdan nîşan kenê.
Wa kes ma rê nêvajo ke nê çîyê ke ma ciwîyenê qeder ê, fitratê ma de estê. Ma do vera pêro hêrişan, her ca de bibê yew, hişmendîya neteweyî aver berê. Ma do bi rêxistinî têbigêrê. Têna Konya de nê pêro cayan de kurdî yenê qetilkerdene. Embaza ma Denîze Poyraz Îzmîr de ameye qetilkerdene. Têna kurdî nê her wayîrê wijdanî ganî verê hêrişanê serê kurdan de vinderê. Eke ma bieşkê cuya demokratîke, azade, têdûşte biafernê ma do bieşkê pê nasnameyê xo biciwîyê. Np zaf zehmet nîyo.
Nê esasî ser o ez reyna keyeyê Dedeogullariyî ra serweşîye wazena. Ez rêzê xo pêro dormeyanê hîsgeran û rayaumûmîye rê pêşkêş kena. Leyla Guven”
XARPÊT
