Endamê Meclîsê Ciwanan ê HDPyî şîyî serdana Hemsereka KCDyî Leyla Guvene û roşanê aye pîroz kerd. Serdayîş de Guvene va: “Vengê Birêz Ocalanî reyde wisar ame Kurdistan. Ma ewro rasta zî roşan pîroz kenê, çunke vengê Birêz Ocalanî resa ma.”
Parlamentera Partîya Demokratîke ya Şaran (HDP) Dersîm Dage teba endamanê meclîsê cinîyanê ciwanan ê HDPyî bi wesîleya Roşanê Remazanî şîyî serdana Guvene û roşanê Guvene pîroz kerd. Guvene, bi keyfweşîye ciwanî pêşwazî kerdî û derheqê çalakîya xo de zanayîşî dayî. Guvene, ewilî kesê ke wextê çalakîye de hepisxaneyan de vera tecrîdî çalakîyê fedayîyî viraştê û cuya xo vîndî kerda, yad kerdî û wina va: “Ez şexsê Zulkuf û Aytene de heme hemrayanê ke nê rayîrî de cuya xo vîndî kerda bi hurmet yad kena.”
Guvene daye zanayne ke înan çalakîya xo bi serkewtişî qedênaya û wina dewam kerd: “Ma vengê Birêz Ocalanî heşna. Vengê Birêz Ocalanî reyde wisar ame Kurdistan. Hewayêkê keyfweşîye serê cimatî de vila kerd. Ma ewro rasta zî roşan pîroz kenê, çunke vengê Birêz Ocalanî rest ma. Ma peyamê aşitî, demokrasî û sîyasetê demokratîkî heşna. Şarê Kurdî her dem dej û keyfweşîye pîya ciwîya. Ameyoxê ma do bibê rojê aşitî, way û biratî û azadîye. Her dem ciwanan serkêşîya naye kerde. Nafa ganî cinîyêk serkêşîya ci bikerdêne. Têkoşînê ma dewam keno. Heta ma azadîya xo bikerê xo dest têkoşînê ma do dewam bikero.”
Endama Meclîsê Ciwanan Merve Oztepe zî ard ziwan ke têkoşînê ciwanan ê vera tecrîdî do dewam bikero û wina va: “No serdayîşê rexnedayîşî yo. Ciwanan nê prosesî de rolê xo kay nêkerd. Labelê qerar û îdîaya ma ya serkêşîye do dewam bikera. Ma do tecrîd bişiknê. Ma do bi qerardarîye û bawerîye têkoşînê xo dewam bikerê. Ma do rexnedayîşê xo pratîkî reyde bidê.” AMED
