Xeylêk wexto ke Rayberê Şarê Kurdî Abullah Ocalanî ra xebere nîna girewtene. Avûkatî hewte de hey semedê pêvînayîşî muracat kenê la muracatê înan bi hewayêkê sîstematîkî bêcewab yenê verdayene. Ge ge bi aşman cuwa pê yeno eşnawitene ke cezaya dîsîplînî ameya dayene. CPT 3ê teşrîna verêne de eşkera kerdbi ke înan Îmrali zîyaret kerdo la Buroyê Huqûqî yê Asrinî 29ê teşrîna peyêne de eşkera kerd ke CPTyî Rayberê Şarê Kurdî Abdullah Ocalanî reyde pêvînayîş nêkerdo. Nê zî qisawetî zêdînayî.
Wekîlê verênî yê Partîya Demokratîke ya Şaran (HDP) Lezgîn Botanî tewirê dezgehanê Ewropa û rayîrê çareserîye ANFyî rê ercna.
Botanî bale ante ser ke Ewropa babeta tecrîdî de mesuldar a û vat: “Konseya Ewropa, Yewîya Ewropa, Komîteya Wezîran a Konseya Ewropa, CPT, Mehkemeya Heqanê Merdiman a Ewropa (MHME) mîyanê îmtîhanêkê cidîyî de yê. Nê dezgehê ke erjanê huqûqî yê Ewropa temsîl kenê, şantajanê Tirkîya ver de sereyê xo anê war û krîteranê xo rê îxanet kenê. MHME û Konseya Ewropa tim Tirkîya tolere kenê. Bi nê hawayî Konseya Ewropa erjanê xo çin kena.”
Metodê îşkenceyî yê giranî dewre de yê
Botanî ard ziwan ke Îmrali de vera Abdullah Ocalanî îşkenceyo psîkolojîk û fîzîksel yeno kerdene û vat: “Avûkat û keyeyî nêeşkenê pêvînayîşî bikerê. Îmrali de sîstemêkê îşkenceyî awan bîyo. Vera Birêz Ocalanî metodê îşkenceyî yê giranî dewre de yê. No raporanê CPTyî de zî amebi eşkerakerdene. Odaya ey 24 saetan yena teqîbkerdene. Sîstemê Îmraliyî sîstemêkê îşkenceyî yo mîyanneteweyî yo. Tecrîd nika pêro zîndanan rê vila bîyo. Vera sîyaset û dezgehanê kurdan zî tecrîd yeno kerdene. Hêrişê vera kurdan û îşkenceyê Îmraliyî yewbînan ra cîya nîyê.”
Sîyasetê Ocalanî berê aştîye akeno
Botanî îfade kerd ke sîyasetê Ocalanî berê aştîye akeno, hêvî û çareserîye danê komelan û vat: “Birêz Ocalan lîderêk o ke dînamîkanê Rojhelatê Mîyanênî zaneno, fikrê ci yenê qebulkerdene û tesîr kenê. Tecrîdê Îmraliyîseba şaran netîceyanê giranan xo de ano. Dewleta tirke vatêne ‘Ma do PKKyî mîyanê 3-5 mengan de çin bikerê’ la wina nêbi. PKK têgêrayîşêkê şarî yo. Çar parçeyanê Kurdistanî û xeylêk cayanê dinya de ameyo qebulkerdene.”
Botanî peynî de vat ke heta ke Rayberê Şarê Kurdî ra agahîye bêra girewtene ganî şarê kurdî û dostê înan tedaya komelkîye giran bikerê û nêrazîbîyayîşê demokratîkî xurt bikerê.
