Navenda Nûçeyan |
Li Dîlok, Edene û Mêrsînê vê serê sibehê polîsan bi ser malên rêveber û endamên Partiya Demokratîk a Gelan (HDP) û Partiya Herêmên Demokratîk (DBP) de girtin û li malan lêgerîn pêk anîn û gelek kesan binçav kirin.
Di serdegirtinên malan ên li Edeneyê de heta niha Endamê Meclisa Ciwanên HDP’a Edeneyê Malzûm Gok jî di nav de 25 kes hatin binçavkirin.
Hat zanîn ku di lêgerîna malan de bi kuçikan pêk hatiye û 5 kesên derbarê wan de biryara binçavkirinê heye ne li malên xwe bûne. Hinceta binçavkirinê nehat zanîn û binçavkiriyan birin Midûriyeta Polîsan a Edeneyê.
Li Dîlokê jî polîsan bi ser gelek malan de girt û gelek kes binçav kirin. Di çarçoveya lêpirsînek ji aliyê Serdozgeriya Komarê ya Dîlokê ve tê birêvebirin de derbarê 50 kesan de biryara binçavkirinê heye. Piştî lêgerîna li malan rêveber û endamên HDP û DBP’ê jî di nav de gelek kes hatin binçavkirin û wan birin Miduriyeta Polîsan a Dîlokê.
Li Mêrsînê jî muzîkjen Arîf Adali û Îsmaîl Înan di serdegirtina malên xwe de hatin binçavkirin. Hinceta binçavkirina muzîkjenan nehat zanîn û ew birin Miduriyeta Polîsan a mêrsînê.
