Operasyonên qirkirina siyasî ya li dijî gelê kurd didome. Di vê çarçoveyê de îro jî li Amedê di encama serdegirtina malan de 22 kes hatin binçavkirin. Bi vê yekê re hejmara kesên li Amedê di hefteyekê de hatine binçavkirin, derket 59’an
Polîsên dewleta tirk di çarçoveya lêpirsîna Serdozgeriya Komarê ya Amedê de, di 8’ê kanûnê de li Amed û navçeyên wê bi ser gelek malan de girt. Di vê çarçoveyê de li gundên navçeya Peyas, Çinar û Baglar ên Amedê 20 kes hatin binçavkirin. Her wiha duh jî li gundên navçeyên Hênê, Lice, Pîran û Karazê jî 17 kes di encama serdegirtina malan de hatibûn binçavkirin. Her wiha pêla binçavkirinan îro jî dom kir.
Tîmên Şaxa Têkoşîna Li Dijî Terorê ya Midûriyeta Emniyetê ya Amedê îro li navçeya Peyas a Amedê bi ser 2 gundan de girtin û 22 kes binçav kirin. Li gorî îdiaya Midûriyeta Emniyetê, di lêgerîna li malan de 271 kîlo û 475 gram teqemenî, 8 bombeyên destan, 12 roketên destan, 7 çek û gelek fîşek, kapsulên bi ceryan, kumandayên dur, pusula, dûrbînên çekan, alavên rêxistinî, ferman û alavên jiyanî hatine dîtin.
Bi binçavkirinên îro re hejmara kesên di hefteyekê de li Amedê hatine binçavkirin derket 59’an. AMED
