Esnafên kolana Sakarya ya Amedê bi sedema ku xizmeta jêrzemînê baş nayê kirin, rê û ronahiya kolanê xerabe ye diyar kirin ku dê nêzî 500 esnaf derabeyên dikanên xwe daxin
Esnafên kolana Sakarya ya navçeya Rezan a Amedê, diyar kirin ku ji ber xizmeta kolanê ya rê, kanalîzasyon û ceyranê nayê kirin êdî muşterî nayên dikanên wan û dê 500 esnaf çalakiya daxistina derabeyan pêk bînin. Esnafan diyar kir ku ger daxwazên wan pêk neyên dê bimeşin ber deriyê Şaredariya Bajarê Mezin a Amedê.
Esnaf ji Ajansa Mezopotamyayê (MA) re axivîn û diyar kirin ku 5 meh berê tora gaza xwezayî kişandin û ji bo vê yekê rê kolan û êdî mirov nikare li kolanê di rê de bimeşin. Esnafan destnîşan kir ku wan bi derfetên xwe xîz û kevir li kolanê rokir û niha her ku baran dibare mirov ji herî û avê nikare derbas bibe. Esnafa jin Emel Ornek, diyar kir ku kolana Sakarya ji aliyê projeya Şaredariya Bajarê Mezin ve tê çêkirin û wiha got: “Karê vê projeyê pir hêdî dimeşe. Esnaf di nav zor û zahmetiyên gelek mezin de ne. Rojê nêzî 20 hezar mirov di virde derbas dibin û halê kolanê ne tu hal e.”
Esnaf Giyasettin Bora jî bal kişand ser rewşa kolanê û xizmeta şaredariyê û wiha got: “Gotin ’em dê kolanê nûjen bikin’ lê li şûna nûjen bikin, ji halê berê xerabtir kirine. Berê çal û herî tune bû. Niha her der çal û herî ye. Qeyûm her dem pesnê xwe bi xizmetê dide. Lê bila werin vir bibînin.
Mehmet Karayil ku 10 sal in esnafiyê dike jî heman tişt anî ziman û wiha got: “Her ku baran dibare kolan di nav heriyê de dimîne. Esnaf ji ber herî, rêya xerabe û nebûna xizmetê dê deriyê dikanên xwe bigirin.”
Esnaf Kazım Donmez jî anî ziman ku ji ber xizmet nayê kirin perîşan bûne û ger daxwazên wan pêk neyên dê bimeşin Şaredariya Bajarê Mezin a Amedê. AMED
