Li navçeya Amûdê ya kantona Qamişloyê ji bo şermezarkirina tecrîda li ser Ocalan û Komploya Navneteweyî ya 15’ê Sibatê, 110 welatiyan dest bi greva birçîbûnê kir
Bi armanca şermezarkirina tecrîda girankirî ya li ser Rêberê Gelê Kurd Abdullah Ocalan, Komploya Navneteweyî ya 15’ê Sibatê û piştgiriya bi çalakiya greva birçîbûnê ya hevseroka KCD’ê û parlamentera HDP’ê ya Colemêrgê Leyla Guven, li navçeya Amûdê ya kantona Qamişloyê 110 welatiyan dest bi greva birçîbûnê kir.
Çalakiya greva birçîbûnê bi pêşengiya Kongreya Star û Meclisa Gel a Amûdê bi dirûşma ‘Bi ruhê berxwedana girtîgehan em ê tecrîdê bişikînin’ hate destpêkirin. Hat zanîn ku çalakî dê 3 rojan bidome. Konê greva birçîbûnê ku bi wêneyên Ocalan û Guven hatin xemilandin, li pêşiya Meclisa Malbatên Şehîdan a Amûdê hatiye vegirtin.
Bêdengî nîşaneya hevkariyê ye
Di çalakiyê de ji rêveberên Kongreya Star a kantona Qamişloyê Minewer Xalid axivî û got ku dê çalakiyên wan ên ji bo piştgiriya bi Guven re berdewam bikin. Xalid diyar kir ku bêdengiya qada navneteweyî ya li hemberî tecrîda girankirî ya li ser Ocalan, nîşaneya hevkariya komployê ye. Çalakî didome. QAMIŞLO
