Navenda Nûçeyan |
Meclisa Leşkerî ya Babê têkildarî çalakiya bersivdayînê ya li dijî artêşa tirk a dagirker û çeteyên wê yên li gundê Yaşlî yê herêma Babê ya dagirkirî bi cih bibûn, daxuyaniyek da.
Meclisê ragihand ku çalakiya li dijî qereqola gundê Yaşlî bi serketî hat kirin, her wiha bi ser 3 çeperên dijmin de hatî girtin û bi xurtî li qereqol û nuqteyên derdorê hatine xistin û wiha got: “19’ê tebaxê di encama êrîşa dagirkeriya tirk a li dijî Navenda Têkiliyan a Meclisa Leşkerî ya Til Temirê de Endama Konseya Leşkerî ya HSD û YPJ’ê hevrê Sosin Bîrhat, Egîd Girkê Legê û 2 şervanên Meclisa Leşkerî ya Til Temirê şehîd bûn. Her wiha di heman rojê de li ser rêka Elî Fero di encama lêdana seyara Endamê Fermandariya Konseya YPG’ê hevrê Rênas Roj şehîd bû.
Her wiha di vê pêvajoyê de dagirkeriya tirk û çeteyên girêdayî wê êrîşên xwe li dijî herêmên me bênavber berdewam kirin û di encama van êrîşan de jin û zarok jî di nav de bi dehan sivîlan jiyana xwe ji dest da û bi dehan kes jî birîndar bûn. Di van êrîşan de her wiha zirereke mezin gihîşt mal û zeviyên sivîlan.”
Meclisa Leşkerî ya Babê diyar kir ku li hember van êrîşên hovane yên dagirkeriya tirk hêzên wan çalakiyeke bersivdayînê ya xurt bi awayekî serkeftî pêk anîne û ev agahî parve kirin:
“Li ser vî esasî 7’ê îlona 2021’ê ji aliyê hêzên me ve qereqola Gundê Yaşlî ya girêdayî Babê ku 60 leşkerên artêşa tirk û çeteyên wî tê de dimînin, hat hedefgirtin, her wiha hêzên me bi 3 çeperên dijmin de girtin. Her wiha qereqol û çend nuqteyên din ên ku parastina wê dikirin, bi armanca bersivdayînê hatin hedefgirtin û bi awayekî bibandor hatin lêdan.
Çalakî bi teqemeniyeke bi bandor dest pê kir. Di encama vê çalakiyê de beşekî mezin ê avahiya qereqolê, maşîneyên zirxî û çeper hatine îmhakirin. Her wiha mewzî, wesayîtên zirxî û çekên giran ên qereqolên derdorê ku parastina wê dikirin jî bi awayekî bibandor hatin lêdan û derbeyeke mezin li dagirkeriya tirk û çeteyên wê hatiye xistin.
Di vê çalakiya bersivdayînê de bi qasî ku me tespît kiriye, encam wiha ne:
12 leşkerên artêşa tirk a dagirker hatine kuştin, 3 jê giran bi giştî 11 leşkerên artêşa tirk a dagirker jî birîndar bûn.
10 çeteyên girêdayî dagirkeriya tirk hatin kuştin û 10 çete jî birîndar bûn.
Her wiha 3 panzêr û 2 wesayîtên kîrpî yên dijmin û gelek avahî, mewzî, çekên giran, wesayît û alavên leşkerî jî hatine îmhakirin û hatine şewitandin.
Di encama vê çalakiya bersivdayînê de hevalekî me birîndar bû û şervanên me yên çalakî kirine bi awayekî serketî vegeriyan baregehên xwe.
Parastina herêma Bakur û Rojhilatê Suriyeyê û gelê vê herêmê û nirxê wê erkeke me ya esasî ye. Em êrîşî tu hêz û welatên din nakin, lê belê dema êrîşên li ser gelê me, herêma me û şervanên me çêbibe, ji bo parastinê tu caran em dudilî nakin û ev mafekî gerdûnî yê rewa ye.”
