HRE’yê bi daxuyaniyekê ragihand ku hêzên wan li gundê Daxilbaş ê Babê li dijî çeteyan çalakî pêk anî û di çalakiyê de çeteyek hate kuştin û 2 çete jî birîndar bûn
Hêzên Rizgariya Efrînê (HRE) têkildarî çalakiyên hêzên wan ên li dijî artêşa tirk û çeteyên wê daxuyaniyeke nivîskî weşand. HRE’yê da zanîn ku li dijî artêşa tirk a dagirker û çeteyên wê li Efrîn û herêmên derdorê wê çalakî û operasyonên hêzên wan bênavber didomin.
HRE’yê diyar kir ku hêzên wan di 27’ê kanûnê saet di 18’00’an de li gundê Daxilbaş ê Babê li hember çeteyên dagirker ên koma Firqat El Hemzetê çalakiya sabotajê pêk anî û di encamê de çeteyek hate kuştin û 2 çete jî birîndar bûn.
Daxuyaniya HRE’yê wiha bi dawî bû: “Piştî çalakiyê jî artêşa tirk a dagirker û çeteyên wê bi çekên giran ên weke tank, obus û hawanan gundên Malikiyê, Merenaz û Kefer Antûn ên Şera ya Efrînê bi dijwarî topbaran kirin. Di encama topbaranê de ziyanên madî gihîşt zevî û milkên şêniyên li herêmê.”
