Operasyona şervanên HSD’ê ya li Baxozê berdewam dike. Hat zanîn ku di çarçoveya şer û pevçûnan de 4 jê çeteyên xwekuj, bi dehan çete hatine kuştin û şer didome
Şervanên Hêzên Sûriyeya Demokratîk (HSD) piştî rizgarkirina bi hezaran sivîlên ji hêla çeteyên DAIŞ’ê ve weke mertalên zindî tên bikaranîn û teslîmbûna bi hezaran çeteyan, li dijî gundê Baxozê operasyon da destpêkirin.
Li gorî agahiyên ji çavkaniyên leşkerî, şervanên HSD’ê ber bi kampa ku çeteyan zarok û malbat weke mertalên zindî bikar dianîn ve pêş ve diçin. Hat zanîn ku 4 jê çeteyên ku êrîşên xwekujiye pêk anîn, bi dehan çete hatine kuştin.
Bi kontrol pêşve diçin
Çavkaniyên HSD’ê ragihand ku di şer de şervanekê HSD’ê jî şehîd bû û 4 şervan jî birîndar bûn. Hate ragihandin ku balafirên koalîsyonê jî ji sibê ve li gelek deveran êrîş pêk anîn. Çavkaniyên HSD’ê ragihand ku li herêmê pir mayîn hatine danîn û ji bo ku windahî çênebin, hêzên wan hêdî û bi kontrol pêşde diçin.
Bi dehhezaran kes ji Baxozê hatin derxistin
Hêjayî bibîrxistinê ye ku şervanên HSD’ê di roja yekşemê saetên piştî nîvro de dest bi operasyona dawî kiribû. Di rojên dawî de piranî jê biyaniyên ji welatên cuda, bi hezaran çete tevî malbatên xwe teslîmî HSD’ê bûn. Ji serê meha kanûnê û vir ve nêzî 59 hezar kes ji herêmê hatine veguhestin. DÊRAZOR
