Piştî nerazîbûnên gelê Şêladizê yên li dijî bombebaran û hebûna baregehên tirk ên li herêmê, rêveberiya PDK’ê gelek hêzên asayîş û pêşmergeyan şandibûn herêmê. Li aliyê din hat ragihandin ku rayedarên PDK’ê ji bo pêşî li van nerazîbûnan bigire, dest bi hewldanên nû kirine.
Li gorî zanyariyên ku çavkaniyên herêmê dane Rojnews, rayedarên PDK’ê 15’ê tîrmehê civînek ji rêveberiya xwe ya herêma Amediyê re çêkiriye. Çavkaniyan destnîşan kirin ku rêveberiya PDK’ê ya herêma Şêladizê, Berpirsê Baskê Hêzên Amediyê ya PDK’ê Emer Oreyî, Berpirsê komîsyona herêma Şêladizê ya PDK’ê Mihemed Seîd Mêzî, berpirsê lîwaya pêşmerge li Şêladizê Haşim Sîtay, mûxtarên gundan û gelek kadroyên PDK’ê yên herêmê tev li civînê bûne.
Çavkaniyan ragihandin ku di civînê de gef li gel hatiye xwarin ku bi tu awayî pêwendî li gel Tevgera Azadiya Kurdistanê ne deynin, li dijî dagirkeriya tirk serî ranekin.
Di civînê de hatiye xwestin gel li hinek herêmên weke Çemço, Avaşîn û heya digihije sînorê Colemêrga bakurê Kurdistanê çek rakin û weke parêzvanên sînor bixebitin.
Rayedarên PDK’ê di civînê de diyar kirine ku ew dixwazin li herêma Zagrosê li gel dewleta tirk deriyekî sînor vekin, lê ev der dibin kontrola gerîlayên PKK’ê de ye, lewma divê gelê herêmê çekan hilde û li ber liv û tevgera gerîlayan bigire.
Çavkaniyan ragihand di civînê de ji bo ku gel îkna bikin ku çek rakin, soza tayînkirina ciwanên zanko qedandine û xizmetgûzariyê hatiye dayîn.
