Tevgera Jinên Azad (TJA) û Meclisa Jinan a HDP’ê, di çarcoveya xebatên 8’ê Adarê Roja Jinan a Cîhanê de bi dirûşma ‘Li dijî qirkirina jinan jiyanê, li dijî tecrîdê azadiyê diparêzin’ li navçeya Cizîrê ya Şirnexê bernameya dengbêjiyê li dar xist. Rêxistinên HDP’ê yên navend û navçeyên Şirnexê tev li bernameyê bûn. Jin bi kincên xwe yên herêmî tev li bernameyê bûn. Bername bi deqeyeke rêzgirtinê dest pê kir.
Di bernameyê de li ser navê jinan aktîvîsta TJA’yê Zozan Înan axivî. Înan di axaftina xwe de bal kişand li ser girîngiya 8’ê Adarê û wiha got: “Hûn dizanin em rojên dîrokî re derbas dikin. Me jinan sala 2020’an jî bi qirkirina jinan derbas kir. Weke tevgera jin em îro di çarçoveya 8’ê Adarê de li Cizîrê kom bûn. Bi dirûşma ‘Li dijî qirkirina jinan jiyanê li dijî tecrîtê azadiyê diparêzin’ me dest bi xebatên xwe kir. Ji Sarayan xeta Rosayan me têkoşîna xwe heta roja îro anî û em didomînin. Têkoşîna me her tim wê bi awayekê çalak bidome. Me li kolanan got ji zilma dewletê û mêr re ‘Êdî bes e’ û em jin dê heta 8’ê Adarê li qadan bin.”
Bername bi gotina klaman û girtina govendê bi dawî bû. ŞIRNEX
