Nûnerên saziyên jinan li dijî bersûcê îstîsmarkarên E.A ya 14 salî çûn Edliyeya Serekaniyê û serlêdana sûc kirin. Nûneren saziyên jinan xwestin bersûcên hatine berdan dîsa bên girtin û cezakirin
Li navçeya Serêkaniyê ya Rihayê zaroka 14 salî E.A., rastî îstîsmara 7 mêrên esnaf hatibû. Piştî bûyer derket holê, ji bersûcên îstîsmarê 6 ji wan di 21’ê Sibatê de hatibûn girtin û yekî jî fîrar kiribû. Heyeta dadgehê piştî 3 mehan di 16’ê gulanê de 3 bersûcên bûyerê bi şerta kontrola edlî serbest berda. Li dijî ve yekê nûnerên saziyên jinan bi herve li Edliyeya Serêkaniyê serlêdana sûc kirin. Nûnerên TJA, Komeleya Jinan a Rosa, Meclisa Jinan a KESK’ê, Platforma Jinan a Şahmaran a Mêrdînê, Platforma Jinan a Rihayê, Mala Jiyanê ya Rihayê, Şaxa ÎHD’ê ya Rihayê, Meclisa Jinan a HDP’ê ya Rihayê, Platforma Jinan a Dîcle Amed (DAKP), Şaxa SES’ê ya Rihayê, Şaxa Egîtim Sena Rihayê, Komîsyona Jinan a Baroya Rihaye, Navenda Mafên Zarokan a Baroya Amedê û Endamên Komîsyona Mafên Astengdaran a Baroya Amedê çûn Edliyeya Serêkaniyê û li serdozgeriyê serlêdana sûc kirin.
Beriya serlêdana sûc bikin li pêş edliyê daxuyanî hat dayîn. Li ser navê nûnerên saziyan hevseroka ÎHD’ê ya Rihayê Nahîde Polat Aslan axivî û anî ziman ku ew hatine li vir bibin mudaxilê doza zaroka 14 salî ya rastî îsmîsmara 7 mêrên hatiye û wiha got: “3 mêr li dijî hiqûqê hatin berdan. Em vê yekê şermezar dikin. Ew qas delîl hene, dixwazin E.A, li dijî pîvanên li derveyî hihûqê bê parastin bihêlin. Daraza Komara Tirkiyeyê carek din Peymana Stenbolê ku îmze avêtiye bin pê îhlal kiriye. Em ê tev bibin hiqûqnasê wê û li pişt wê bin.”
Daxuyanî bi çepik û dirûmeyan bi dawî bû. RIHA
