Karkerên kurd ên ku ji Mêrdînê ji bo berhevkirina findiqan çûn navçeya Akçakoca ya Duzceyê, duh bi şev bi êrîşa nijadperestan re rûbirû man. Muhammed Gunel yek ji wan karkeran e ku ji Ajansa MA’yê re axivî û qala êrîşa li hember wan pêk hatiye kir.
Gunel da xuyakirin ku ew beriya mehekê 8 kesên ji Mêrdînê ji bo komkirina findiqan hatine Duzceyê û cama paceya mala ku duh şev lê diman ji nişka ve bi kevirekî ku ji derve hat avêtin hat şikandin û destnîşan kir ku wan dît ku du kes li ber derî li benda wan in, dema ku derketin ku fêm bikin ka çi qewimiye û van kesan gotiye ew naxwazin karkerên kurd li vir bimînin.
Gunel diyar kir ku heman kesan gefên wekî ‘Ger hûn di 10 deqeyan de vî cihî vala nekin, em ê mala we bişewitînin, em ê bi kevir û tivingê werin we’ li wan xwarine û got ku paşê nêzî 20-30 kesî kom bûne û heqaret li wan kirine û gef li wan xwarin e.
Gunel diyar kir ku wan li ser vê yekê du caran bi telefonê li polîsan geriyane û rewşê vegotine lê polîsan gotiye ‘Em nikarin werin berî ku bûyerek biqewime’ û wî ji ji polîsan re gotiye ‘Wê hingê hûn ê werin cenazeyên me werbigirin.’
Gunel da zanîn ku paşê polîs hatine ew birine miduriyeta polîsan û pişt re du êrîşkar jî hatine û ne li ser êrîşkaran li ser wan lêgerîn pêk hatiye û got polîsan ji wan xwestiye ser bûyerê bigirin.
Gunel destnîşan kir ku ew hê li mala ku êrîş lê hatiye kirin dimînin û hevalê wî Mehmet Furkan Çîçek ji bo îfadeya wî bê girtin birin dozgeriyê û ew niha tiştên xwe didin hev da ku vegerin bajarê xwe Mêrdînê. DUZCE
