Li Edeneyê 12’emîn Fûara Pirtûkan a Çukurovayê dest pê kir. Fûar dê heta 13’ê çileyê dewam bike û weşanxaneyên Aram û Ava jî beşdarî fûarê dibin. Edîtorê weşanên Aramê Ulaş Guldîken got ku ew hewl didin xwe bigihînih hemû xwendevanên xwe
Bi hevkariya TUYAP Adana Fûarcilik û Yekitiya Weşangerên Tirkiyeyê îsal cara 12’emîn Fûara Pirtûkan a Çukurovayê tê lidarxistin. Fûarê îro dest pê kir û dê heta 13’ê mehê dewam bike. Fûar dê di navbera saet 10:00 û 20:00’an de ji bo pirtûkhezan vekirî be.
Îsal 300 weşanxane beşdarî fûarê bûn û her wiha weşanxaneyên Aram û Ava ku pirtûkên kurdî jî çap dikin beşdarî fûarê bûn. Di çarçoveya bernameya fûara pirtûkan de dê panel, gotûbêj, atolye û bernameyên ji bo zarokan bên lidarxistin.
Xwe digihînin xwendevanan
Edîtorê weşanên Aramê Ulaş Guldîken têkildarî fûarê agahî da û wiha got: “Heya ji destê me were em dixwazin li her derê xwe bigihînin xwînerên xwe. Ji bo xwegihandina xwîneran, fûar girîng in. Em hevdu nas dikin, dipeyîvin û nîqaş dikin.”
Guldîken destnîşan kir ji bo ku weşanxaneyan şîrove û rexneyên xwendevanan pir girîng in û wiha domand: “Em li ser pirtûk û projeyên ku pêk bên diaxivin. A din jî di rojên wiha tengezar de em hêzê didin hev û ji bo rojên xweştir têdikoşin.”
Guldîken bang li hemû xwendevanan kir ku bên serdana fûarê û wiha bi dawî kir: “Em li vir in û li benda wan in.” EDENE
