Komên çete yên girêdayî dewleta tirk li gundê Dêrbelût ê Cindirês a Efrînê bi ser gund de girt û 9 sivîl revandin. Çarenûsa şêniyên ku çeteyan ber bi cihekî nediyar ve birine, nayê zanîn
Zilm û zordariya hêzên artêşa tirk û komên çete yên girêdayî wê yên li ser şêniyên resen ên Efrînê bênavber berdewamin. Di vê çarçoveyê de hêzên dagirker li Efrînê rojane welatiyan direvînin, îşkence dikin û dikujin.
Di çarçoveya van binpêkirinan de koma çete ya Feyleq El Şam ku baskê Îxwanan ên girêdayî dewleta tirk in, di serê vê sibehê de li gundê Dêrbelût ê navçeya Cindirês a Efrînê bi ser malan de girt. Hat zanîn ku di encdama serdegirtina malan de 9 sivîl hatin revandin.
Li gorî agahiyên ji çavkaniyên herêmê, navên kesên hatine revandin wiha ne: “Mihemed Menan Silêman ,Mihemed Mihemed Silêman, Luqman Mihemed Abdo, Ehmed Wehîd Şiko, Îsmaîl Şêx, Bekir Mihemed Belker, Cîhad Mihemed Xelîl, Şêxmûs Reşîd Tahir û Mehmûd Mihemed Izat Fatûme.”
Çavkaniyan destnîşan kir ku kesên hatine revandin, ber bi cihekî nediyar ve hatine birin û çarenûsa wan nediyar e. EFRÎN
