Dewleta tirk û çeteyên wê li Efrînê sûcên şer dikin. Hêzên dagirker bênavber welatiyan direvînin, îşkence dikin, dizî û talanê dikin û hewl didin temamiya demografyaya Efrînê biguherînin
Hêzên artêşa tirk a dagirker û komên çete yên girêdayî wê zêdetirî saleke ku Efrîn dagir kirine. Hêzên dagirker li Efrînê zilmekî mezin li ser şêniyên Efrînê dikin û hewl didin ku temamiya demografyaya herêmê biguherînin. Girtin, binçavkirin, revandin, îşkence kirin û destdirêjî tenê ji çend pêkanînên hêzên dagirker in. Tevî ku gelek bûyerên ku dikevin çarçoveya sûcên şer ên dewleta tirk hatine belgekirin û radestî rêxistinên mafên mirovan ên navdewletî, Neteweyên Yekbûyî (NY) û Rûsyayê hatine kirin jî, hemû cîhan li dijî zilma dewleta tirk a li Efrînê bêdeng e. Dewleta tirk ku ji vê bêdengiyê hêz digire û niha jî bi lêkirina dîwar re dixwaze Efrînê tev li axa xwe bike.
Çend bûyerên di demên dawî de li Efrînê qewimîn wiha ne:
* Koma çete ya Ehrar El Şerqiyeyê di 27’ê nîsanê de welatiyê bi navê Heyder Mihemed (33) ê ji gundê Ciqle El Wista yê Şiyê revand. Piştî ku 100 hezar lîre ji Mihemed hate stendin, berdan.
* Komên çete jina bi navê Nebîha Mistefa û bûka wê li gundê Meşalê yê Şerayê revandin. Tu agahî ji van welatiyan nayên girtin.
* Çend hefte berê welatiyê bi navê Hisên Şewket li gundê Hibo yê Mabatayê hate revandin.
* Demek berê jî parêzerê bi navê Abdulrehman Bermeceh ê ji gundê Kefer Sefrayê dema ku çeteyan mala birayê wî dişêland, hate revandin.
* Welatiyê bi navê Îbrahîm Xelîl ê ji bajarokê Badîna yê Mabatayê, di 3’yê gulanê de dema li nava zeviya xwe ya li geliyê Dirêmiyê yê Mabatayê hate revandin û tu agahî jê nayên girtin.
Ferzkirina fîdyeyan
* Koma çete ya Firqet El Hemzat bi bedela cotkirina zeviyan, li ser şêniyên ji gundê Qedeh ê Racoyê nêzî milyoneke lîreyê Sûriyeyê ferz kir.
* Koma çete ya Silêman Şah li ser şêniyên Şiyê û gundewarên wê bi hezaran lîre fîdye ferz dike. Yek ji van gundan jî gundê Qermitlik ê Şiyê ye.
* Koma çete ya Firqet El Hemzat li ser şêniyên gundê Coqa yê Efrînê her meh 500 lîreyên Sûriyeyê ferz kir.
Serdagirtin û dizî
* Çeteyên dagirker di 8’ê gulanê de li gundê Coqa yê Efrînê bi ser mala Osman Nûrî Mistefa de girt û Mistefa îşkence kir. Piştre jî çeteyan bi ser mala Mihemed Hemdûş de girt û 15 pez û jenaratora wî dizîn.
* Çeteyan li gundê Til Tewîl ê Efrînê bi ser mala Fetah Alî Naso de girt û 10 pezên wî dizîn.
* Malbatên heman komên çete ku li gund hatine bicihkirin, pelên tirî yên welatiyê bi navê Fozî Reşo dizîn û zirar dan rezê wî.
* Dewleta tirk navên gundan, kolanên sereke, avahiyên giştî, nexweşxane û hwd. diguherîne.
* Dewleta tirk di ketina pira kevn a li navenda Efrînê de wêneyê Erdogan daliqand. EFRÎN
