Li benda kontrolê ya hêzên artêşa tirk û çeteyên wê ya li gundê Tirindê yê Efrînê teqîn pêk hat. Hat zanîn ku di encama teqînê de leşkerekî artêşa tirk hate kuştin û 2 çete jî birîndar bûn
Çalakiyên şervanên kurd ên li Efrînê yên li dijî hêzên dagirker ên artêşa tirk û komên çete yên girêdayî wê berdewam in. Di vê çarçoveyê de bi taybet jî di van rojên dawî de şervanên Hêzên Rizgariya Efrînê (HRE) hema hema li her deverên Efrînê çalakiyên bi bandor pêk tîne.
Li gorî agahiyan, îro jî di saetên serê sibehê de li ser rêya gundê Tirindê yê girêdayî navenda Efrînê, li dijî benda kontrolê ya ku leşkerên artêşa tirk û çeteyên wê disekinin teqînek pêk hat. Li gorî agahiyên destpêkê, di teqînê de leşkerekî artêşa tirk hate kuştin û du çeteyên koma çete ya Firqet Hemzat jî birîndar bûn.
Heta niha tu rêxistinan teqîn li xwe negirtine. Lê hêjayî gotinê ye ku bi taybet jî di nava rojên dawî de çalakiyên şervanên HRE’yê yên li dijî artêşa tirk û çeteyên wê yên li Efrînê zêde bûne. EFRÎN
